Golovkın World Boxing-ty reformalaýǵa ýáde berdi: ashyqtyq pen adaldyq - basty maqsat
ASTANA. KAZINFORM – Gennadıı Golovkın World Boxing halyqaralyq federatsııasynyń prezıdenti bolyp saılandy. Osylaısha ol halyqaralyq sport uıymyn basqarǵan alǵashqy qazaqstandyq atanyp otyr.
Daýys berý nátıjesinde G. Golovkınnyń kandıdatýrasy biraýyzdan qoldaý tapty. Kongreske álemniń 58 elinen ulttyq boks federatsııalary qatysty.
Rım qalasynda World Boxing federatsııasynyń prezıdenti laýazymyna kandıdattardyń tanystyrylymy ótti. Óziniń baǵdarlamalyq sózinde GGG eń mańyzdy qundylyq bokstyń bolashaǵy úshin kúresýge daıyn ekenin aıtty.
Ol uıymnyń adaldyqqa, ashyqtyqqa jáne sportshylarǵa baǵyttalǵan basqarýǵa muqtaj ekenin atap ótip, óziniń baǵdarlamasynda tórt negizgi baǵytty atap kórsetti. Olar sportshylar eń aldymen, adaldyq, ınnovatsııalar, ınnovatsııalar jáne qarjylyq turaqtylyq.
Golovkınniń aıtýynsha, federatsııa músheleriniń qoldaýy arqasynda World Boxing Halyqaralyq Olımpıada komıtetiniń tolyq senimin qaıtara alady jáne bokstyń Olımpıadadaǵy ornyn bekemdeıdi – tek Los-Andjeles-2028 oıyndarynda ǵana emes, bolashaq barlyq Olımpıadalarda saqtalady.
– Men bokstaǵy barlyq kezeńnen óttim. Sportshy boldym, Olımpıada oıyndaryna qatystym. Álem chempıony atandym. Búginde sport basshysy retinde qyzmet etip júrmin. Munda eń mańyzdysy – bokstyń bolashaǵy úshin kúresý úshin keldim. Halyqaralyq Olımpıada komıteti Olympism365 komıssııasynyń múshesi jáne World Boxing Olımpıadalyq komıssııasynyń tóraǵasy retinde bilemin. Durys basqarý – sportshylar men sportty qorǵaıtyn negizgi faktor, – dedi ol.
Golovkın kelesi jyldan bastap óz ıdeıalaryn júzege asyra bastaıtynyn, uıym múshelerin árbir qadam boıynsha habardar etip otyratynyn jetkizdi.
– Biz búgin úlken qadam jasadyq. Sportshylar senetin, Olımpıadalyq otbasy qurmetteıtin federatsııaǵa aınalýymyz kerek. Men adal, kóp eńbek etetin jáne tıimdi jumys isteıtin kóshbasshylar tobyn quramyn. Óıtkeni lıderlik adamdardan ústem bolý emes, olarmen birge turý. Birlik – uran emes, bizdiń kúndelikti jumys tásilimiz bolýy tıis. World Boxing ashyq, birikken jáne sportshyǵa baǵyttalǵan uıymǵa aınalýy kerek. Bolashaqty birge quraıyq, – dedi Gennadıı Golovkın.
Resmı taǵaıyndalǵannan keıingi sózinde ol árbir boksshynyń ádil ári qaýipsiz sportta ósip, damýyn qalaıtynyn aıtty.
– Biz birikken kezde, World Boxing bir otbasy retinde alǵa jyljıdy. Sózben emes, ispen dáleldeımiz – World Boxing Olımpıadalyq otbasy senim artatyn federatsııaǵa aınalady. Biz táýelsiz bolamyz, biraq Olımpıadalyq qundylyqtardy qurmetteımiz, – dep atap ótti ol.
Aıta keteıik, Gennadıı Golovkınniń ókilettik merzimi 3 jylǵa sozylady.