Golovkın WBO chempıony Pıter Kýıllınmen kezdesýge nıettenip otyr
ASTANA. QazAqparat - WBA jáne IBO chempıony qazaqstandyq boksshy Gennadıı Golovkın WBO chempıony Pıter Kýıllınmen kezdesýge nıet tanytyp otyr. Bul týraly «VKontakte» áleýmettik jelisindegi boksshynyń «Gennadıı GGG Golovkın» paraqshasynda málim etildi.
«Men barlyǵyna ashyqpyn. Sharshy alańda menimen jekpe-jekke shyqqysy keletin boksshylardy kórgim keledi. Eger Chaves menimen judyryqtasqysy kelmese, meniń salmaǵymdaǵy ózge de chempıondar shyǵady dep úmittenemin. Mysaly, «Kid Chocolate» (WBO tıtýlynyń ıegeri Pıter Kýıllın), - deıdi G.Golovkın.
Sonymen qatar paraqshada málim etilgenindeı, Golovkınniń promoýteri Tom Leffler Búkilálemdik boks qaýymdastyǵyna (WBA) tıtýldy qorǵaýǵa mindettelgen Djarrod Fletchermen bolatyn kezdesýdi Denıel Gılmen uıymdastyrylǵaly jatqan jekpe-jek úshin keıinge shegerý jóninde usynys tastaǵan.
«Tom Leffler men Gerı Shoý (D.Gıldyń promoýteri) Golovkın-Gıl kezdesýi boıynsha kelissózder júrgizýde», - delinedi habarlamada.
Eger Gılmen aradaǵy jekpe-jek oryn alatyn bolsa, ol 20 myń oryndyq Madison Square Garden stadıonynda ótedi dep josparlanýda. Lefflerdiń aıtýynsha, eger atalmysh shara ótetin bolsa, ol HBO Championship Boxing úshin bıylǵy jyldyń eń keremet oqıǵalarynyń biri bolar edi.
Golovkınniń komandasy reıtıngte úshinshi orynda turǵan Gılmen kezdesýdi ótkizýge úlken qyzyǵýshylyq tanytýda. BAQ pen mamandardyń oıynsha, Gıl WBA tıtýlynyń mindetti úmitkeri Djarrod Fletcherden áldeqaıda myqty.
Golovkınniń sózine qaraǵanda, ol WBA-nyń kez kelgen sheshimine syılastyqpen qaraıdy, degenmen oǵan Gıl laıyqty qarsylas dep esepteıdi.
«Bir kezderi ol birneshe tıtýldyń ıegeri bolǵan boksshy. Ol tamasha boksshy ekenin bilemin. Onda nege bolmasqa? Men barlyǵyn syılaımyn, ol meniń boksshy retindegi jumysym», - dep atap ótti ol.
Sonymen qatar Leffler bul jekpe-jek NVO translıatsııasy úshin tamasha kezdesý ekenin atap ótti.
«Gıl kezinde NVO-da judyryqtasty. Biz oǵan sáýirde usynys tastaǵan bolatynbyz, degenmen avstralııalyq pay per view úshin bolmaı qaldy. Endi barlyǵy iske asatyn sekildi. Men onyń promoýterimen kelissóz júrgizýdemin jáne olar jaqsy ótýde», - deıdi Leffler.
