Golovkın WBC tujyrymdamasy boıynsha álem chempıony ataǵyna tıtýl ıesiz qalǵan jaǵdaıda ıe bola alady
ASTANA. QazAqparat - WBC qaýlysyna sáıkes, eger Mıgel Kotto - Saýl Alvares jekpe-jeginiń jeńimpazy Gennadıı Golovkınmen atalǵan uıymnyń tujyrymdamasy boıynsha ortasha salmaqtaǵy álem chempıony ataǵy úshin aıqasýdan bas tartsa, bul beldik avtomatty túrde Gennadııge beriledi, dep aqparattandyrady Sports.kz.
Bul týraly BoxingScene.com-ǵa WBC prezıdenti Maýrsıo Súleıman habarlady.
«Triple G-men taıtalasty boldyrmaýdyń jalǵyz amaly - tartylǵan barlyq taraptardyń jaǵdaıdy basqa jolmen sheshý týraly kelisimge qol qoıýy. Biraq WBC-diń pikiri aıqyn bolyp qalyp otyr: 21 qarashada jeńiske jetken boksshy Golovkınmen kezdesýi tıis», - dep atap ótti Súleıman.
Sondaı-aq eger Kotto nemese «Kanelo» Golovkınniń toby jáne WBC-men kelispeı, basqa joldy tańdasa, olarǵa tıtýldy bosatýǵa týra keledi. Keri jaǵdaıda, olarǵa WBC sanktsııalary qoldanylady, al Golovkın chempıondyq belbeýdiń tolyq quqyly ıesi bolatyny habarlanyp otyr.
