Golovkın VS Alvares: Kelisim boıynsha taǵy qandaı máselelerdi retteý kerek
ASTANA. QazAqparat - Gennadıı Golovkınniń promoýteri Tom Lefflerdiń sózine qaraǵanda, búginde alda kútilip otyrǵan jekpe-jekti keńinen jarnamalaýǵa qatysty birqatar kelisimderge kelý kerek, dep habarlaıdy QazAqparat tilshisi.
«Jekpe-jekti ótkizetin oryn, baspasóz máslıhattary uıymdastyrylatyn qalalar men datalar, bıletterdiń sany men baǵasy - bunyń barlyǵyn áli de talqylap, retteý kerek. Alaıda biz Golden Boy-men bárin oıdaǵydaı sheshe alamyz dep oılaımyn. Shyny kerek, bul jekpe-jek - úlken oqıǵa. Sol sebepti barlyǵy ony óz alańynda ótkizýdi qalaıdy. Árıne, árqaısysy da úlken boks keshin ótkizýge laıyqty. Gennadıı bolsa, kez kelgen jerde judyryqtasýǵa daıyn. Ol tarıhı jekpe-jekterdi ótkizýdi qalaıdy. Al osy jolǵy jekpe-jektiń jóni bólek», - dep atap kórsetti Lefler UCNlive.com saıtyna bergen suhbatynda.
Aıta keteıik , aǵymdaǵy jyly 16 qyrkúıek kúni WBA Super, WBC, IBF jáne IBO nusqasy boıynsha orta salmaqtaǵy álem chempıony Gennadıı Golovkın meksıkalyq Saýl «Kanelo»Alvarespen kezdesedi. Ol jaıynda boksshylar ótken demalys kúnderi ótken aıqastan keıin jarııalady. Sol jekpe-jekte Alvares óziniń jerlesi kishi Chavesti upaı sanymen utqan bolatyn. Aldyn ala boljamǵa sáıkes, Alvarestiń sońǵy aıqasy GGG-den jeti ese artyq PPV jınady.
