Golovkın VS Alvares: GGG bir upaımen alǵa shyqty
ASTANA. QazAqparat - Jaqynda TMZ arnasyna suxbat bergen Gennadıı Golovkın óziniń kelesi qarsylasy - meksıkalyq Saýl Alvarestiń sońǵy jekpe-jegin «tsırk» dep atady. Al «Kanelonyń» óz buryshynda oryndyqqa da otyrmaı bokstasqanyn jankúıerlerge emes, qyzdarǵa arnalǵan shoýǵa teńedi. Golovkınniń aıtýynsha, Alvareske óz bulshyq etterin kórsetkenshe, Hýlıo Sezar kishi Chavesti birden nokaýtqa túsirý kerek edi, dep habarlaıdy QazAqparat tilshisi.
Boxingnews24.com saıtynyń jýrnalısi Adam Godfrı qazaqstandyq boksshynyń sońǵy málimdemesin saraptap shyqty. Onyń oıynsha, ondaı sózder Golovkınniń «dıplomatııalyq» minezine sáıkes kelmese de, ol óz qarsylasyn sózben jaıdan-jaı túırep ótken joq. «Alvares-Chaves jekpe-jeginen keıin rıngke shyqqan Golovkın múldem basqasha sóıledi. Sol kezde ol meksıkalyq boksshynyń ónerin joǵary baǵalady. Qazirgi málimdemesi oǵan kereǵar. Bálkim, rıngsaıda otyrǵanda Golovkın jekpe-jekti basqasha qabyldady. Al teledıdardan qaıta kórgennen keıin óz kózqarasyn ózgertti. Joq, olaı emes sııaqty. Rıngke shyqqanda Gennadıı qobaljyǵan bolar. Ol da qısynǵa kelmeıdi», - dep jazdy Adam Godfrı.
Jýrnalıstiń sózine qaraǵanda, bunyń barlyǵy - aldaǵy jekpe-jekti keńinen nasıxattaýdyń taktıkasy, xalyqtyń qyzyǵýshylyǵyn arttyrýdyń amaly. Sebebi boksshylar arasyndaǵy osy ispetti teketirester jankúıerlerdiń jekpe-jekti kórýge degen yntasyn kúsheıtedi.
«Kórelik, Golovkınniń osy «artıllerııalyq soqqysynan» keıin onyń qarsylasy dál solaı jaýap bere ala ma? Aı-qaıdam, «Kanelo» aǵylshyn tilinde sóılemeıdi. Iá, Golovkın de tamasha sóıleıdi dep aıta almaımyz. Bir sózin qaıtalaı beredi. Degenmen, tildi ustartý jaǵynan ol aıtarlyqtaı jetistikke jetti. Al naǵyz «treshtokıngti» jasaý úshin sóıleı berý kerek. Golovkın men Alvares arasynda biz ondaı teketiresti kóre almaıtyn sııaqtymyz. Gennadıı ezýin bir tartyp, sózben soqqy jasasa, «Kanelo» úshin Oskar De La Hoııa jaýap beretin shyǵar. Qalaı bolsa da, sóz jarysynyń birinshi raýndy Golovkınniń paıdasyna sheshilip otyr», - dep atap kórsetti avtor.
Aıta keteıik, buǵan deıin AQSh jýrnalısteri Golovkındi aǵylshyn tilin úırengeni úshin maqtaǵan bolatyn.
