Golovkın Ulttyq olımpıada komıtetine jańa bas hatshy saılady
ASTANA. KAZINFORM – Búgin Astanada Qazaqstan Ulttyq olımpıadalyq komıteti Bas Assambleıasynyń kezekten tys jıyny ótti, dep habarlaıdy uıymnyń baspasóz qyzmeti.
Qazaqstan UOK basqarýshy organynyń otyrysyna Qazaqstan UOK prezıdenti Gennadıı Golovkın, QR sport jáne týrızm vıtse-mınıstri Serik Jarasbaev, sondaı-aq olımpıadalyq sport túrleri boıynsha 33 Ulttyq sporttyq federatsııalardyń ókilderi qatysty.
Gennadıı Golovkın sportshylardyń Parıj Olımpıadasyndaǵy jetistikterine toqtalyp, jarys tsıkliniń áli de jalǵasyp jatqanyn atap ótti. Sonymen qatar 2028 jyly Los-Andjeleste ótetin kelesi jazǵy oıyndarǵa daıyndyqty qazirden bastaý kerektigine nazar aýdardy.
Bas Assambleıanyń kún tártibinde qaralǵan suraqtardyń biri – jańa bas hatshyny saılaý. Óz kezeginde Gennadıı Golovkın Álimjan Aqaevtyń kandıdatýrasyn usynyp, usynysty qatysýshylar biraýyzdan bekitti.
«Bas Assambleıa múshelerine maǵan senim artyp, men usynǵan kandıdatty qoldaǵany úshin alǵys aıtamyn. Álimjan Aqaevty jańa qyzmetke saılanýymen quttyqtaımyn. Onyń jyldar boıy jınaǵan tájirıbesi men bilimi alǵa qoıylǵan maqsattarǵa jetýge kómekteserine senemin», - dedi Gennadıı Golovkın.
Anyqtama: Álimjan Aqaevtyń memlekettik basqarý magıstri dárejesi (Dreık ýnıversıteti, Des Moınes, Aıova shtaty, AQSh), Іskerlik basqarý magıstri dárejesi (Soltústik Aıova magıstri, Sedar-Folls, Aıova shtaty, AQSh), Syrtqy saıasat salasyndaǵy Memlekettik basqarý dıplomy (Reseı SІM Dıplomatııalyq Akademııasy, Máskeý, RF) bar.
Álimjan Aqaev jeti jyl kóleminde Qazaqstan Ulttyq olımpıadalyq komıtetiniń halyqaralyq qatynastar Departamentin basqaryp, halyqaralyq forýmdar men konferentsııalarda Qazaqstan Ulttyq UOK múddesin qorǵady jáne Qazaqstannyń álemdik sport arenasyndaǵy baılanysy men bedelin nyǵaıtý jolynda qyzmet etti. 2024 jyldyń aqpanynan bastap Qazaqstan UOK prezıdentiniń halyqaralyq máseleler jónindegi keńesshisi qyzmetin atqardy.
