«Golovkın-Ýeıd» jekpe-jegine Qaırat Nurtas pen MýzART tobynyń boljamy
ASTANA. QazAqparat - Gennadıı Golovkın men Domınık Ýeıd arasyndaǵy jekpe-jegi qarsańynda «Qazaqstan» TRK aty shýly juldyzdar men sportshylardyń eń qyzyqty kommentarıılerin iriktedi.
«Aldaǵy kúresti qazaqstandyqtardyń basym bóligi sııaqty úıde kóretin shyǵarmyn. Eki oılymyn. Genanyń jeńiske jetýine sensem de, azdap qobaljyǵanym da joq emes. Árıne, qazirgi ýaqytta Genaǵa saı keletin básekeles joq. Úshinshi raýndta Gena Ýeıdti nokaýtqa jiberedi degen oıdamyn. Biraq, Ýeıdtiń jetinshi raýndqa deıin tiri qalǵanyn qalaımyn. Qalaı bolaryn kóre jatarmyz», - dep oıymen bólisti Qaırat Nurtas.
«MýzART»: «Gastrolde bolsaq ta, Genanyń jekpe-jekterin jiberip almaýǵa tyrysamyz. Sońǵy kezderi tipten ýaıymdamaımyz da, sebebi kez kelgen qarsylasyn jeńedi degen senimdemiz. Budan da asqan qyzyqty sátterdiń kýágeri bolǵymyz keledi. Ýeıd jekpe-jek barysynda biraz bolsa da Golovkınge qıyndyqtar týǵyzyp, ózin jaqsy kórsetedi degen oıdamyz. Gena barsha qazaqstandyqtardyń júregin jaýlap aldy jáne onyń jeńisin sózsiz kútemiz».
Basqa da qazaqstandyq shoý-bıznes ókilderi qandaı pikirde?
Marjan Arapbaeva: «Biz barlyq otbasymyzben Genany qoldaımyz jáne osy joly da jeńetinine kúmán keltirmeımiz. Biz oǵan senemiz jáne ony qoldaımyz. Gena sııaqty sportshymyzdyń bar ekenin maqtan tutamyn. Biz, qazaqstandyq estradanyń ókilderi qashan da Genamen birgemiz. Aıtarym, Gena, osy jeńisterińmen toqtap qalma, tek qana alǵa!».
Aıqyn Tólepbergen: «Men Golovkınniń jekpe-jegin mindetti túrde kóremin. Jeksenbi kúni sol úshin erte turyp, uıqymdy qııýǵa ázirmin. Men onyń jeńisine senemin. Álemniń eń myqty boksshysy ekenin dáleldeı aldy. Genanyń árbir soqqysy biz úshin mańyzdy. Oǵan tek qana jeńis tileımin!».
Árıne, qazaqstandyqtardyń basym bóligi atalmysh jekpe-jekti otbasylarymen birge «Qazaqstan» telearnasynan kórýdi josparlap otyr. Golovkınniń jekpe-jegin otbasymen birge jınalyp qaraý dástúrge aınalyp barady desek artyq bolmaıdy. Biz otandasymyzdy qoldap qana qoımaı, óskeleń urpaqtyń boıynda otansúıgishtik sezimin tárbıeleýdemiz.
Qazaqstan halqy Genanyń jekpe-jegin otbasylarymen birge úıde tamashalaýdy josparlasa, tanymal sportshy Aıdar Mahmetov qazirgi ýaqytta Ábý-Dabıda ótip jatqan djıý-djıtsý boıynsha álem chempıonatynda qola medaldi ıelendi. Óziniń aıtýynsha, Genanyń kúresin tys qaldyrmaıdy jáne ınternettegi kaztrk.kz saıtynan tamashalaıtyn bolady.
Aıdar Mahmetov: «Bul jekpe-jekten Gena óziniń qarsylasyn kezekti nokaýtqa jiberedi degen oıdamyn. Onyń ústine qarsylasy asa qıyndyq ta týǵyzbas. Qarsylasynyń jas, ári órshil ekenine qaramastan, Gena úshin asa qaýipti emes. Meniń paıymdaýymsha, jekpe-jek 6-raýndtyń birinshi jartysynda nokaýdpen aıaqtalady».
Sondaı-aq, óziniń boljamdarymen qazaqstandyq taekvondoshy Arman Chılmanov pen Qazaqstannyń MMA federatsııasynyń prezıdenti Anatolıı Kım de bólisti. Olar bul jekpe-jekti dostarymmen tamashalaıtyn bolady. Olar da Genanyń jeńisin kútedi jáne oǵan sózsiz senedi.
Esterińizge sala keteıik, Golovkın men Ýeıdtiń jekpe-jegin 24 sáýir kúni Astana ýaqyty boıynsha saǵat 07:00-de «Qazaqstan» telearnasynan jáne kaztrk.kz saıtynan tamashalaı alasyzdar. Sonymen qatar, jankúıerler úshin «Qazmedıa ortalyǵynda» arnaıy translıatsııa uıymdastyralatyn bolady.
