Golovkın salmaq sanatynan tys úzdik boksshylar reıtınginde rekord ornatty
NUR-SULTAN. QazAqparat - Orta salmaqta IBF jáne IBO tujyrymdary boıynsha álem chempıony qazaqstandyq Gennadıı Golovkın (40-1-1, 35 KO) qazirgi boksshylar arasynda The Ring jýrnalynyń P4P reıtınginde eń uzaq turaqtaǵan sportshy atandy, dep habarlaıdy QazAqparat Sports.kz-ke silteme jasap.
Úzdik boksshylardyń ondyǵyna Golovkın 249 apta buryn kirgen, al qazir jetinshi orynda. Úzdikter qatarynda júrgenderdiń taǵy biri - WBO chempıony amerıkalyq Terens Kroýford (35-0, 26 KO), onyń osy tizimge qosylǵanyna 238 apta bolypty.
Myqtylar tiziminiń úshinshi ókili - jeńil salmaq sanatynda WBC, WBA (Super) jáne WBO chempıony Vasılıı Lomachenko (14-1, 10 KO). Tizimge 180 apta buryn kirgen ýkraınalyq boksshy, qazir ekinshi orynda tur.
P4P reıtınginde meksıkalyq Saýl «Kanelo» Alvares (53-1-2, 36 KO) kósh bastap tur. Orta salmaqta WBC (Franchise) jáne WBA (Super), ekinshi orta salmaqta WBA (Regular) jáne jartylaı aýyr salmaqta WBO chempıony tiziminde turǵanyna endi ǵana 61 apta boldy, óıtkeni 2018 jylǵy dopıng daýynan keıin tizimnen shyǵyp qalǵan bolatyn.
