«Golovkın-Rolls» anderkartynda taǵy bir qazaqstandyq boksshy jekpe-jekke shyǵady

NUR-SULTAN. QazAqparat - 9 maýsymda AQSh-ta ótetin Golovkın-Rolls aıqasynyń anderkartynda qazaqstandyq boksshy Bahtııar Eıýbov sharshy alańǵa shyǵady, dep habarlaıdy QazAqparat tilshisi.

Bul týraly jańalyq «Qazaqstan kásipqoı boksy» VKtontakte paraqshasynda jarııalandy.

Bahtııar Eıýbov (14-0-1, 12KO) jańadan shyǵyp kele jatqan amerıkalyq boks juldyzy Braıan Sebalomen (8-0, 4KO) segiz raýndtyq aıqasta kezdesedi.

«15 aqpanda Kanzas shtatynyń Malveın qalasynda ótken sońǵy jekpe-jeginde Eıýbov birinshi ret kezdesýin jeńispen aıaqtaı almaı, meksıkalyq Hose Lýıs Rodrıgespen (25-13-1, 13KO) teń túsken», - delingen habarlamada.

Eske sala ketsek, atalmysh aıtýly jekpe-jek keshinde jeńilip kórmegen qazaqstandyq kásipqoı boksshy Álı Ahmedov (14-0, 10KO) 8 maýsymda Nıý-Iorkte ótetin Gennadıı Golovkın (38-1-1, 34KO) - Stıv Rolls (19-0, 10KO) aıqasynyń anderkartynda rıngke shyǵatynyn buǵan deıin habarlaǵan bolatynbyz.

Ol 34 jastaǵy Abraham Hanmen kezdesedi. Abraham Han kásipqoı boksta 26 ret jeńiske (onyń 16-syn nokaýtpen) jetken. Tórt ret jeńilip, bir márte qarsylasymen teń túsken.

9 maýsymda ótetin boks keshine Danııar Eleýsinov te shyǵatyny habarlanǵanymen, keıin onyń belgisiz sebepterge baılanysty ol keshte óner kórsetpeıtini belgili boldy.