Golovkın-Rolls anderkarty: Qazaqstandyq «nokaýt koroli» jeńiliske ushyrady

NUR-SULTAN. QazAqparat - Golovkın-Rolls aıqasynyń anderkartynda sharshy alańǵa shyqqan 32 jastaǵy aqtóbelik boksshy Baqtııar Eıýbov (14-0-1, 12 KO) amerıkalyq Braıan Sebaloǵa (8-0, 4 KO) ese jiberdi, dep habarlaıdy QazAqparat tilshisi.

Orta salmaqtaǵy Eıýbov-Sebalo boksy 8 raýndqa sozyldy. Baqtııar Eıýbov birinshi raýndta kóbine qorǵana qımyldady. Sebalo raýnd sońyna taman qarsylasyna birneshe apperkot ótkize aldy. Baqtııar úshinshi raýndtyń ortasynda qarymta shabýyldarǵa ıek artyp, basymdyqty óz jaǵyna aýdardy. Alaıda, altynshy raýndta Sebalo qarqyn údete bastady. Boıshań amerıkalyqtyń soqqylary jerlesimizge dóp tıip jatty. Sońǵy mınýtta qos sportshy ashyq aıqasqa shyqty.

Tóreshilerdiń sheshimimen Braıan Sebalo upaı sanymen jeńiske jetti. Osylaısha, Baqtııar Eıýbov kásibı rıngte birinshi ret jeńiliske ushyrady.

Byltyr maýsym aıynda Aqtóbe týmasy Detroıttaǵy boks keshinde tájirıbeli amerıkalyq boksshy Nıkolas Gıvendi tehnıkalyq nokaýtpen jeńgen bolatyn. Sóıtip, ol IBF tujyrymy boıynsha birinshi orta salmaqtaǵy chempıon óńirlik tıtýlyna ıe boldy.

Aıta keteıik, Nıý-Iorktegi basty boks keshin qazaqstandyqtar tikeleı efırde «Qazsport» jáne «Qazaqstan» telearnalarynan kóre alady.