Golovkın rıngke qaıta orala ma

ASTANA. KAZINFORM – Bir kezderi qazaqstandyqtardyń tań uıqysyn «urlaǵan» Gennadıı Golovkın bylǵary qolǵabyn qaıta kıip, sharshy alańda aıqasqa shyǵýy múmkin ekenin jasyrmady. 

Búginde UOK prezıdenti qyzmetin atqaryp júrgen dańqty otandasymyz Gennadıı Golovkın Boxingscene.com basylymyna bergen suhbatynda bokspen qosh aıtyspaǵanyn alǵa tartty.

«Bokstan ketetinim týraly eshqashan aıtqan emespin. Bárine ýaqyt tóreshi. Qazir meniń aldymda úlken maqsat tur. Bastysy, atqaryp jatqan jumysym ózime unaıdy. Sport, qımyl-qozǵalys, jattyǵý meniń ómirimniń mánine aınalǵan. Eger bireý meni sharshy alańǵa shaqyryp, ol usynysy kóńilden shyqsa, ony qabyldaýǵa daıynmyn. Sondyqtan alda GGG-diń qatysýymmen ótetin jekpe-jektiń kýási bolýlaryńyz ábden múmkin, - dedi Gennadıı Golovkın. 

Aıta keteıik, álemge áıgili kásipqoı boksshy sońǵy ret sharshy alańǵa 2022 jyldyń kúzinde shyǵyp, tóreshilerdiń ortaq sheshimimen meksıkalyq Saýl Alvareske ese jibergen bolatyn.

Esterińizge salsaq, buǵan deıin Gennadıı Golovkın Olımpıada boksyndaǵy kúrdeli máseleni aıtyp bergen edi.