Golovkın AQSh-taǵy Halyqaralyq boks Dańq zalyna qabyldaý saltanatyna qatysady
ASTANA.KAZINFORM – Qazaqstan kásipqoı boksynyń ańyzy, Olımpıada oıyndarynyń kúmis júldegeri Gennadıı Golovkın (42-2-1, 37KO) Halyqaralyq bokstyń Dańq zalyna (IBHOF) resmı túrde qabyldaný rásimine qatysý úshin Amerıka Qurama Shtattaryna bardy.
Espn.com saıtynyń habarlaýynsha, Gennadıı «GGG» Golovkın 11-14 maýsym kúnderi Nıý-Iorktegi Kanastotada ótetin Halyqaralyq boks Dańq zalyna qabyldaý saltanatty sharasyna qatysady.
Aıta keterligi, Gennadıı Golovkın Halyqaralyq boks Dańq zalyna múshe bolǵan alǵashqy qazaqstandyq kásipqoı boksshy. Ár jyldary bul Dańq zalyna Muhammed Álı, Maık Taıson, Floıd Meıvezer, Mennı Pakıao syndy ańyzdar, sondaı-aq Kostıa Tszıý (2011), Vıtalıı Klıchko (2018) jáne Vladımır Klıchko (2021) engen.
Osyǵan deıin habarlaǵanymyzdaı, 2025 jylǵy daýys berý nátıjesinde Golovkınmen birge Vernon Forrest pen Stıv Kollıns te úzdik tizimge ilikti. Daýys berýge AQSh, Japonııa, Anglııa, Kanada, Argentına, Avstralııa, Nıderland, Germanııa jáne Meksıkadan sport jýrnalısteri men boks tarıhshylary qatysty.
Gennadıı Golovkın orta salmaqta WBA/IBF/WBC nusqasy boıynsha uzaq jyldar chempıondyq ataǵyn qorǵap, boks jankúıerleri úshin keremet jekpe-jekter ótkizdi. Otandasymyz sońǵy jekpe-jegin 2022 jyly meksıkalyq Saýl Alvareske qarsy ótkizip, tóreshiler sheshimimen jeńilip qalǵan bolatyn.
