Golovkın R4R reıtınginiń úzdik úshtigine enbeı qaldy

ASTANA. QazAqparat - Amerıkanyń Sports Illustrated basylymy álemniń úzdik boksshylarynyń salmaq sanattarynan tys (pound-for-pound) reıtınginiń jańartylǵan nusqasyn jarııalady, dep habarlaıdy QazAqparat Sports.kz saıtyna silteme jasap.

Úzdik 10 sportshynyń tiziminde birinshi orynda ýkraınalyq boksshy Vasılıı Lomachenko tur. Ekinshi orynǵa Meksıka boksshysy Saýl «Kanelo» Alvares ornalassa, kóshbasshylar úshtigin AQSh ókili Terens Kroýford tuıyqtady.

Orta salmaqtaǵy burynǵy álem chempıony Gennadıı Golovkın tizimde besinshi pozıtsııada tur.

«GGG men «Kanelo» arasyndaǵy jekpe-jekter Golovkınniń bedeline nuqsan keltirgen joq jáne ol ortasha dıvızıonda 2019 jylǵa «oqtaýly» kúıi, óz tıtýldaryn jáne eń joǵary pozıtsııany qaıtaryp alý múmkindigimen aıaq basyp otyr. Gennadııdiń kelesi jekpe-jegi kimmen bolatyny onyń qaı telejelige qosylatynyna baılanysty. Orta salmaqtaǵy chempıondyq tıtýldar, sondaı-aq Alvarespen úshinshi aıqas - DAZN-da bolady. Sonymen qatar, eger Golovkın El Heımonmen kelisimshartqa otyrsa, Djermall Charlomen kezdesýi de múmkin», - dep jazady basylym.

Basylym jarııalaǵan TOP-10 kelesideı:

1. Vasılıı Lomachenko
2. Saýl «Kanelo» Alvares
3. Terens Kroýford
4. Aleksandr Ýsık
5. Gennadıı Golovkın
6. Maıkı Garsııa
7. Errol Spens
8. Srısaket Sor Rýngvısaı
9. Naoıa Inoýe
10. Leo Santa Krýs