Golovkın ózin ekijúzdi dep sanaıtyn «Kaneloǵa» jaýap berdi

LOS-ANDJELES. QazAqparat – Qazaqstandyq boksshy Gennadıı Golovkın Los-Andjeleste ótken baspasóz máslıhatynda ózin ekijúzdi dep sanaıtyn Saýl «Kanelo» Alvareske jaýap berdi, dep habarlaıdy QazAqparat áleýmettik jelidegi «Qazaqstannyń kásipqoı boksy» paraqshasyna silteme jasap.

Búgin Los-Andjeleste «Golovkın – Alvares» jekpe-jegi aldynda baspasóz máslıhaty uıymdastyrylǵanyn, onda boksshylar kóz arbasý protsedýrasyn ótkizgenin jazǵan bolatynbyz.

Buǵan deıin «Kanelo» bul aıqas ózi úshin «jeke teketires» ekenin aıtqan edi. Sondaı-aq ol Golovkındi birneshe ret sózben qaǵytyp, ony ekijúzdi dep sanaıtynyn málimdedi.

«Bul men úshin jeke másele dep aıtpas edim. Ózimdi jaqsy, ne jaman adam ekenimdi bireýge dáleldeýge talpynbaımyn. Qandaı adam bolsam, sol qalpymdamyn. Jáne aıtyp óteıin: jeke basqa qatysty sezimim joq – men bokstasýǵa shyǵamyn. Eger meniń jeke basyma qatysty máselesi bolsa, bul meniń problemam emes. Bul onyń sheshimi. Onyń túsinigin qalaısha ózgertýim kerek?», - dedi G.Golovkın baspasóz máslıhatynda.

Qos boksshynyń trılogııasy aldynda eki baspasóz máslıhaty uıymdastyrylatyny osyǵan deıin habarlandy. Birinshisi 24 maýsymda ótse, ekinshisi 27 maýsymǵa (Nıý-Iork) josparlanǵan.

Eske salsaq, Gennadıı Golovkın ekinshi orta salmaqtaǵy álemniń absolıýttik chempıony Saýl Alvareske qarsy jekpe-jegi 17 qyrkúıekte ótedi . Jekpe-jek Las-Vegastaǵy T-Mobile arenasynda bolady. Olardyń buǵan deıingi sońǵy eki kezdesýi de dál sol jerde ótti. Álemdik jekpe-jekttiń birinshisi teń aıaqtalsa, ekinshisinde tóreshiler jeńisti meksıkalyq boksshyǵa berdi. Biraq keıin kóptegen sarapshylar bul nátıjeni ádiletsiz dep atady.

Úshinshi jekpe-jek sýperorta salmaqta ótedi.