Golovkın óz promoýterlerin Frochpen aıqas jónindegi áńgimeni doǵarýǵa shaqyrdy
ASTANA. QazAqparat - Qazaqstandyq boksshy Gennadıı Golovkın promoýteri Tom Leffler men Eddı Hırndy brıtandyq Karl Frochpen bolýy múmkin aıqas jaıly áńgimeni doǵarýǵa shaqyrdy, dep habarlaıdy Vesti.kz.
Boksshylardyń osydan birneshe jyl buryn kezdesýleri múmkin de edi, biraq kelissóz tyǵyryqqa tireldi. Óıtkeni 2015 jyly Froch óziniń sporttyq jolyn aıaqtady.
Golovkın - Froch jekpe-jegi týraly jańa talqylaýlardyń órbýine Lefflerdiń tvıti sebep boldy. Onda qazaqstandyqtyń promoýteri áriptesi Eddı Hırnmen birge túsken sýretin jarııalap, ózderiniń londondyq "Ýemblı" stadıonynda aıqasty ótkizý týraly kelissóz júrgizip jatqandyǵyn málimdegen edi.
Sońynan Hırnniń ózi bul aqparatty teriske shyǵardy. Brıtandyq Lefflerdiń bul málimdesin ázilge balady. Biraq 2015 jylǵy shildede sporttyq jolyn aıaqtaǵan Frochtyń Golovkınmen aıqas úshin rıngke qaıta oralýy múmkin ekendigin de joqqa shyǵarmady.
Endi osyǵan baılanysty Golovkın resmı tvıtter arqyly jaýap berip otyr.
«Meniń dostarym, sizdermen sóılesetin ýaqyt keldi. Eı, djentlmender Tom Leffler men Eddı Hırn, eger eshqandaı alǵa jyljý bolmasa, aıqastyń bolýy múmkin degen áńgimeni doǵaryńdar»,- dep jazdy Golovkın.
