Golovkın ońasha qalyp jattyǵýǵa kiristi
ASTANA. QazAqparat - Ǵalamtorda Gennadıı Golovkınniń Denıel Djeıkobspen jekpe-jeginiń aldyndaǵy jattyǵýy túsirilgen vıdeo shyqty. Túsirilim Kalıfornııadaǵy Big Bear jattyǵý lagerinde júrgizilgen, bul sportshynyń týǵan jerine qatty uqsas, dep jazady VKontakte jelisindegi resmı GGG toby.
WBA (Super), IBO, WBC jáne IBF nusqalary boıynsha orta salmaqtaǵy álem chempıony qazaqstandyq Gennadıı Golovkın (36-0, 33 KO) naýryz aıynda Madison Square Garden alańynda ótetin amerıkalyq Denıel Djeıkobspen (32-1, 29 KO) kezdesýge bar kúshin salyp daıyndalýda.
Taýly, ári aýasy taza osy jattyǵý lageri kóptegen sportshylardyń kóńilinen shyǵady. GGG bapkeri Abel Sanchestiń aıtýynsha, Big Bear alqaby Golovkınge ońasha qalýǵa, daıyndyqqa ǵana mán berýge qolaılylyǵymen sondaı-aq, tabıǵaty Qazaqstanǵa keletindigimen unaıdy.
Foto/vıdeo: vk.com/ggolovkin
