Golovkın Mýratamen ótetin jekpe-jek týraly resmı málimdeme jasady

NUR-SULTAN. QazAqparat – Orta salmaqtaǵy IBF/IBO álem chempıony Gennadıı Golovkın (41-1-1, 36 KO) osy salmaqta WBA Super tıtýlynyń ıegeri Rıota Mýratamen (16-2, 13 KO) ótetin jekpe-jek týraly resmı málimdeme jasady, dep habarlaıdy QazAqparat Sports.kz-ke silteme jasap.

Gennadıı óziniń áleýmettik jelidegi paraqshasynda 29 jeltoqsan, sársenbi kúni Saıtamada (Japonııa) ótetin jáne DAZN strımıng servısi kórsetetin sharanyń afıshasyn jarııalady.

«Japonııada úlken drama bolmaq. 29 jeltoqsanda kezdesemiz», - dep jazdy GGG.

Aıta keteıik, eki boksshy úshin aldaǵy aıqas uzaq úzilisten keıingi alǵashqy jekpe-jek bolmaq. Golovkın ótken jyldyń jeltoqsan aıynan bastap sharshy alańǵa shyqpaǵan bolatyn, al Mýrata 2019 jyldyń sońynan beri judyryqtaspaǵan.