Golovkın: Meniń negizgi nysanam - Martınes
ASTANA. QazAqparat - WBA jáne IBO nusqalary boıynsha orta salmaqtaǵy álem chempıony qazaqstandyq Gennadıı Golovkın áli de WBC beldiginiń ıegeri argentınalyq Serhıo Martınespen qolǵap túıistirgisi keletinin málimdedi. Bul týraly «R-Sport»-qa silteme jasap, vesti.kz habarlady.
Ol óziniń Osýmaný Adamamen ótkizgen jekpe-jegi týraly aıta kele, endigi kezekte Serhıo Martınespen kúsh synasqysy keletinin aıtty. «Men ózimdi óte jaqsy sezinip júrdim, kórsetken ónerime kóńilim ábden toldy. Birinshi raýndtan bastap-aq jekpe-jek men úshin qolaıly boldy. Kúshim men urys júrgizý jyldamdyǵymnyń arqasynda ózimdi erkin sezindim. Ol aýyr qarsylas, biraq men doda sátinde esh qıyndyq sezingen joqpyn. Ortasha salmaqta kimniń shyn mánisinde myqty ekenin anyqtaý úshin endi Serhıo Martınespen judyryqtasqym keledi», - deıdi G. Golovkın.
Golovkınniń promoýteri Tom Lefflerdiń aıtýynsha, qazaqstandyq boksshynyń kelesi jekpe-jegi 26 sáýirde Nıý-Iorkte ótýi múmkin. Golovkınniń qarsylasy ázirge atalmaıdy. Al Martınestiń kezekti jekpe-jegi de Nıý-Iorkte ótedi, onyń kúni 7 maýsym dep belgilengen. Eger taraptar barlyq sharttarǵa kelisse, 38 jastaǵy argentınalyq boksshynyń qarsylasy pýertorıkalyq Mıgel Kotto bolady.
Esterińizge sala keteıik, Gennadıı Golovkın búgin túnde Monakoda ótken jekpe-jekte ganalyq boksshy Osýmaný Adamany 7 raýndta tehnıkalyq nokaýtpen utyp, jeńiske qol jetkizdi.
