Golovkın men Sonderstiń jekpe-jegi kúzge josparlanǵan - promoýter
ASTANA. QazAqparat -Qazaqstandyq bylǵary qolǵap sheberi Gennadıı Golovkın brıtanııalyq Bıllı Djo Sonderstiń qalaýy boıynsha onymen kezdesýi múmkin, dep habarlaıdy «SPORTINFORM» SAA vRINGe.com-ǵa silteme jasap.
Orta salmaqtaǵy álem chempıony Gennadıı Golovkın (37-0-1, 33 KO) men brıtanııalyq Bıllı Djo Sonders (26-0, 12 KO) mamyr-maýsym aralyǵynda kezdesý ótkizýge kelise almaǵanmen, bul mámile ózektiligin joıǵan joq. Brıtanııalyq boksshynyń promoýteri Frenk Ýorrenniń sózine qaraǵanda, jekpe-jekti kúzde uıymdastyrý úshin kelissózder júrip jatyr.
«Men Golovkınniń promoýteri Tom Lefflermen sóılestim, Golovkın-Sonders jekpe-jegin kúzde ótkizýdi josparlap jatyrmyz. Bıll qolynan jaraqat alǵan edi. Al Golovkınniń komandasy jekpe-jekti 5 mamyr kúni ótkizýdi josparlaǵan. Bul jekpe-jekti maýsymda ótkizý de múmkin bolmaı tur», - deıdi ol BoxingScene basylymyna bergen suhbatynda.
«Onyń ústine Bıll 23 maýsymda Martın Marreımen kezdesip, tıtýlyn qorǵaıdy. Jeńgen jaǵdaıda, kúzde Golovkınmen kezdesýde tıtýldardy biriktirý múmkindigi týady. Ol aýqymdy kezdesý bolatyn edi, biz ony Brıtanııada qýana ótkizer edik», - deıdi Frenk.
