Golovkın men Mıýrreıdiń jekpe-jegin «Qazaqstan» telearnasy tikeleı efırde kórsetedi
ASTANA. QazAqparat - 21 aqpanda Monte-Karlodaǵy «Salle des Etoiles» arenasynda jyldyń basty boks keshi - WBA jáne IBO nusqasy boıynsha orta salmaqtaǵy álem chempıony Gennadıı Golovkın men WBA nusqasy boıynsha álemniń ýaqytsha chempıony (2012-2013) brıtandyq Martın Mıýrreı arasynda kezdesý ótedi.
Bul týraly «Qazaqstan» respýblıkalyq teleradıokorporatsııasynyń baspasóz qyzmeti habarlady.
Basty kezdesýi Golovkın men Mıýrreı arasyndaǵy jekpe-jek sanalatyn kásipqoı boks keshindegi barlyq tórt matchty da otandyq sportsúıer qaýym aqpannyń 21-inen 22-sine qaraǵan túni «Qazaqstan» Ulttyq telearnasynyń tikeleı efırinde saǵat 01.30 - dan bastap tamashalaı alady.
Bul kezdesýlerdiń barlyǵy 22 aqpan kúni tańǵy 10.00-da «KazSport» telearnasy jekpe-jekti qaıtalap kórsetiledi.
Esterińizge sala keteıik, Golovkınniń qarsylastarynyń birde-biri qazaqstandyqqa qarsy ótkizgen 12 raýndtyq jekpe-jekterin aıaǵyna deıin jetkize alǵan emes. Gennadıı kásipqoı boksta judyryq túıistirgen 31 qarsylasynyń 28-in nokaýtqa túsirip, 17 matchty merziminen buryn aıaqtaǵan. Mıýrreıge qarsy match Golovkın úshin kásibı rıngtegi 32-shi kezdesý bolǵaly tur. Golovkın WBA nusqasy boıynsha álem chempıony ataǵyn 12-nshi ret qorǵamaq.
Gennadıı Golovkın - qazaqstandyq boksshy, Qaraǵandy qalasynyń týmasy. 2003 jyly kásipqoı boksshylar arasyndaǵy álem chempıony jáne 2004 jylǵy Olımpıada oıyndarynyń kúmis júldegeri, Qazaqstan Respýblıkasynyń eńbek sińirgen sport sheberi, Qazaqstannyń 7 dúrkin chempıony, birneshe halyqaralyq týrnırlerdiń jeńimpazy.
Astana qalasynda 2013 jyldyń 24 sáýirinde ótken Qazaqstan halqy Assambleıasynda XX sessııasynda ataqty sportshy ózi týraly: «Meniń ultym jaıly suraǵan kezde men: Ákem - orys, sheshem - káris, al men - qazaqpyn! - dep jaýap beremin. Meniń barlyq jeńisterim elime, halqyma, prezıdentime arnalady!», - dep aıtqan bolatyn.
