Golovkın men Mýratanyń jekpe-jegi qashan ótedi

NUR-SULTAN. QazAqparat – Qazaqstandyq boksshy Gennadıı Golovkın men japondyq Rıota Mýrata 28 jeltoqsan kúni Tokıoda orta salmaqtaǵy chempıondyq tıtýl úshin birlesken jekpe-jek ótkizetini týraly túbegeıli kelisimge keldi. Bul týraly The Athletic málim etti, dep habarlaıdy QazAqparat Sports.kz saıtyna silteme jasap.

39 jastaǵy Golovkın (41-1-1, 36 KO) – IBF jáne IBO tıtýldarynyń ıegeri, sońǵy aıqasyn 2020 jyldyń jeltoqsanynda ótkizdi. Jetinshi raýndta polıak Kamıl Sheremetany tehnıkalyq nokaýtpen jeńdi. Ol mansabynda bir-aq ret meksıkalyq Saýl Alvaresten jeńilis tapqan.

35 jastaǵy Mýrata (16-2, 13 KO) – WBA nusqasy boıynsha álem sýperchempıony.

Budan erterek Golovkın men Mýratanyń bir kardta osy jyldyń tamyz-qyrkúıek aılarynda óner kórsetetini habarlanǵan bolatyn. Olardyń qarsylastarynyń aty áli jarııa etilmedi. Al ekeýiniń jekpe-jegi basynan bastap Jańa jyldyń qarsańyna, 31 jeltoqsanǵa josparlanǵan.