Golovkın men Mýrata jekpe-jek aldynda salmaq ólshedi
NUR-SULTAN. QazAqparat – Saıtamada (Japonııa) 9 sáýir kúni boks keshine qatysýshylardyń salmaq ólsheý rásimi ótti. Bul keshtiń basty oqıǵasy orta salmaqtaǵy álem chempıondary Gennadıı Golovkın (41-1-1, 36 KO) men Rıota Mýrata (16-2, 13 KO) arasyndaǵy kezdesý bolmaq, dep habarlaıdy QazAqparat Sports.kz saıtyna silteme jasap.
Qarsylastar orta salmaqtaǵy IBF jáne WBA Super tıtýldary úshin judyryqtasady. Salmaq ólsheý qorytyndysy boıynsha eki boksshy da sanat shegin (72,5 keli / 160 fýntqa deıin) oryndap, tarazyda 72,5 keli salmaqty kórsetti.
Saıtamadaǵy boks keshi senbi, 9 sáýir kúni Nur-Sultan ýaqyty boıynsha saǵat 15:00-de bastalady. Golovkın men Mýratanyń basty jekpe-jegi shamamen saǵat 18:10-ǵa josparlanǵan. Qos boksshynyń rıngte kezdesýin Qazsport jáne Qazaqstan telearnalarynda tikeleı efır arqyly tamashalaýǵa bolady.
Foto: twitter.com/GGGBoxing
