Golovkın men Mýrata jekpe-jek aldynda betpe-bet kezdesti

NUR-SULTAN. QazAqparat – Qazaqstandyq boksshy Gennadıı Golovkın men japondyq Rıota Mýrata aldaǵy jekpe-jektiń aldynda birinshi ret betpe-bet kezdesti. Olar orta salmaqtaǵy IBF, WBA Super jáne IBO álem chempıony tıtýldary úshin judyryq túıistiredi, dep habarlaıdy QazAqparat Sports.kz-ke silteme jasap.

«Maǵan berilgen múmkindik úshin alǵys aıtamyn. Japonııada júrgenim - men úshin zor ǵanıbet. Mýratamen kezdeskenime jáne tıtýldyq aıqasymyz ótetinine qýanyshtymyn. Rıotany tulǵa retinde qatty qurmetteımin. Jekpe-jek aldynda ýaqytymyz kóp boldy, sondyqtan ekeýmiz de jaqsy daıyndaldyq. Keremet jekpe-jek bolady. Álemdegi jaǵdaı qazir shynynda kúrdeli. Mundaı sharany uıymdastyrýǵa qandaı kúsh-qýat kerek ekenin túsinemin. Promoýterler men Japonııa úkimetine osy shoýdyń ótkizilýine qoldaý bildirgenderi úshin rahmet aıtamyn. Osy kezdesýdi kópten kútkenderdiń úmitin aqtaıtyndaı jekpe-jek ótkizgim keledi»,

- dedi Gennadıı Golovkın Tokıodaǵy BAQ ókilderine bergen baspasóz máslıhatynda.

Shara barysynda boksshylar belbeýlerin kórsetip, sýretke tústi. Gennadıı áleýmettik jelidegi paraqshalarynda sharadan beınetúsirilim jarııalady.

Eske salaıyq, Gennadıı Golovkın - Rıota Mýrata jekpe-jegi 9 sáýirde Saıtamada ótedi. Bul - Japonııanyń boks tarıhyndaǵy eń aýqymdy oqıǵa bolmaq. Jergilikti halyq Golovkındi ystyq yqylaspen qarsy alǵanyn eske salamyz.

Aıtýly shoýdy «Qazsport» jáne «Qazaqstan» telearnalary tikeleı efırden kórsetedi.

Foto: twitter.com/GGGBoxing