Golovkın men «Kanelonyń» rematchy jónindegi kezdesýler bastaldy

ASTANA. QazAqparat - Golden Boy Promotions bas dırektory Oskar de la Hoııa promoýter Tom Lefflermen qyrkúıekte Alvares - Golovkın rematchyn ótkizý týraly kelissózderdi bastaǵanyn málimdedi, dep jazady Sports.kz.

Onyń basty sharty meksıkalyq sportshynyń VADA-nyń dopıngke qarsy baǵdarlamasyna qosylýy bolatyn. Búgin boksshy jáne onyń ókili Erık Gomes osy sharttyń oryndalýyn resmı túrde jarııalady.

«Tommen kelissózderdi bastadyq. Biz rematchtyń bolǵanyn qalaımyz, bul durys is bolar edi. Árbir myqty boksshy jyl saıyn VADA-nyń tekserýinen ótip otyrýy tıis. Óıtkeni ol sportty tazartýdyń jalǵyz joly», - dedi Oskar de la Hoııa ESPN.com-ǵa bergen suhbatynda.

Onyń aıtýynsha, «Kanelo» men GGG qazir bir-birin unatpaıtyn bolýy múmkin.

«Eger jekpe-jek qyrkúıekte ótse, qyzyqtyraq bolar edi. Endi olar bir-birine ata jaýyndaı qarap otyr. Eger ol qyrkúıekte bolsa, sumdyq jekpe-jek bolar edi. «Kanelo» mindetti túrde qyrkúıekte rıngke oralady. Endi sheginetin jol joq. Óıtkeni GGG aıqasýdy qalaıdy, «Kanelo» da úlken jekpe-jek ótkizgisi kelip otyr», - deıdi Oskar.