Golovkın men «Kanelo» sońǵy baspasóz máslıhatyn ótkizip, kóz arbasty
«Bul jerge oralǵanyma qýanyshtymyn. Sońǵy saparymnan keıin tórt jyl ótti. Qazir men osyndamyn. Menińshe, bul bútin boks álemi úshin eń úlken kún. Fanattarǵa eń úlken syı. Ózimdi jaıly sezinemin, men babymdamyn, men daıynmyn. Jeńiske jetetinime, óz-ózime, óz komandama, maǵan qoldaý bildirip otyrǵan adamdarǵa senimdimin. «Kanelo» ekeýimiz kásipqoı sportshymyz. Onyń strategııasy anaǵurlym agressıvti, al men kóbine tájirıbeme súıenemin. Kóremiz. Rıng kimniń myqty ekenin kórsetedi. Bul ómirde bári de bolýy múmkin», - dedi Golovkın.
Óz kezeginde Saýl Alvares Golovkındi merziminen buryn jeńetinine senimi baryn atap ótti.
«Rıngke qaıta oralǵanyma qýanyshtymyn. Bul maǵan úlken emotsııa jáne motıvatsııa beredi. Buǵan deıingi jekpe-jegimde jeńilip qaldym, biraq men óz jolymnan taımaı, únemi alǵa – shyńǵa umtylatyn adammyn. Men óte kóp jumys istedim jáne bul kezdesýdi 12 raýndta aıaqtaı alatynymdy sezemin. Bul aýyr bolatynyn bilemin, alaıda ómirde esh nárse ońaı berilmeıdi. Men únemi qıyndyqtardy eńserýge tyrysamyn. Bul aıqasty merziminen buryn aıaqtaýǵa shynymen de oqtalyp otyrmyn. Onymen bir mezgilde, aldymda aýyr qarsylas, myqty ári aqyldy boksshy turǵanyn bilemin. Degenmen, meniń maqsatym osy», - dedi «Kanelo».
Tilshilerge suhbat bergennen keıin boksshylar dástúrli kóz arbasý rásimin ótkizdi.
Eske salaıyq, Golovkın-Alvares jekpe-jegi 18 qyrkúıek kúni (astana ýaqytymen) Las-Vegastyń (SShA) T-Mobile Arena kesheninde ótedi.
Qazaqstandyqtar boks keshin «Qazaqstan» jáne «Qazsport» telearnalarynan tikeleı efırden kóre alady. Bastalýy – 18 qyrkúıek, saǵat 05:00. Basty aıqas shamamen 08.00-de bastalady.
GGG men «Kanelo»-nyń 2017 jyly ótken alǵashqy aıqasy tóreshilerdiń túrli daýysymen teń aıaqtalǵan edi. 2018 jyly bolǵan rematch tóreshilerdiń basym daýysymen Alvarestiń paıdasyna sheshildi. Trılogııa sýperorta salmaqta (birinshi jáne ekinshi kezdesýler orta salmaqta ótken bolatyn) ótedi. Qazir bul sanattaǵy barlyq chempıondyq tıtýl «Kaneloǵa» tıesili. Al Golovkınniń enshisinde WBA Super, IBF jáne IBO nusqalary boıynsha orta salmaqtaǵy beldikter bar.
