Golovkın men «Kanelo» Aıdos Erbosynulyna qoldaý kórsetti

ASTANA. QazAqparat – Sýper orta salmaqta álemniń absolıýtti chempıony Saýl «Kanelo» Alvares aýyr nokaýt alyp aýrýhanaǵa túsken Aıdos Erbosynulyna qoldaý kórsetti. Qazaqstandyq boksshy Gennadıı Golovkın de otandasynyń tezirek aıyǵyp ketýine tilestestik bildirdi, dep habarlaıdy QazAqparat Sports.kz resýrsyna silteme jasap.

«Sen úshin duǵadamyn, baýyrym», — dep jazdy «Kanelo» óziniń Instagram paraqshasyndaǵy «storıske» qazaqstandyq sportshynyń sýretin júktep.

Aıta keteıik, Aıdos Erbosynuly osy jyldyń kókteminde Saýl Alvarestiń sparrıng-serigi bolǵan.

«Deniń saý bolsyn, tezirek jazylyp ket, Aıdos. Týystary men jaqyndaryna sabyr bersin», - dep jazdy Gennadıı Golovkın Instagram «storısine».

Eske sala keteıik, ótken demalys kúnderi sýper orta salmaqta WBA nusqasy boıynsha «turaqty» álem chempıony tıtýly úshin ótken jekpe-jekte Erbosynuly kýbalyq Davıd Morrelden aýyr nokaýt alyp, jeńilip qalǵan bolatyn.

Keıinnen aýrýhanaǵa jetkizilgen Aıdostyń jasandy komada jatqany belgili boldy.

Kúni keshe ǵana onyń komadan shyqqany habarlanǵan edi. Dárigerlerdiń aıtýynsha, Aıdostyń ómirine qaýip tónip turǵan joq.

Foto: instagram.com/yerbossynuly_aidos