Golovkın men Djeıkobs komandalary jekpe-jek týraly kelisimge kele almady

ASTANA. QazAqparat - WBA/IBO/IBF/WBC boıynsha orta salmaqtaǵy álem chempıony Gennadıı Golovkın (36-0, 33 KO) men Denıel Djeıkobs (32-1, 29 KO) kezdesýi jónindegi kelissózder aıaqsyz qaldy, dep habarlaıdy sports.kz.

BoxingScene WBA prezıdenti Jılberto Mendosqa silteme jasap habarlaýynsha, promoýterler berilgen merzimde kezdesý týraly kelisim jasamady. Resmı túrde taraptardyń birneshe saǵat ýaqyty bar, alaıda  Golovkın - Djeıkobs jekpe-jeginiń taǵdyry 19 jeltoqsanda Panama astanasyndaǵy WBA shtab-páterinde ótetin promoýterlik saýdada sheshiledi dep tolyq senimmen aıtýǵa bolady.

Golovkın men Djeıkobs kezdesýi 18 naýryz kúni Medıson Skver Gardende (Nıý-Iork) ótýi múmkin, orta salmaqtaǵy eń atyshýly aıqasty HBO telearnasy kórsetedi.

Eger saýdalasýda Djeıkobs promoýterleri jeńse, kezdesý ýaqytyn nemese ótetin ornyn ózgertýge, tipti múldem boldyrmaı tastaý quqyǵyna ıe bolady. Bar másele Golovkınniń kelisimshart boıynsha, HBO-nyń basty qarsylasy Showtime telearnasyna shyǵa almaıtyny bolyp tur.

Gennadıı Golovkınniń kelesi kezdesýiniń anderkartynda ýkraınalyq Aleksandr Ýsık aýyr salmaqta WBO ataǵyn qorǵaıdy.