Golovkın men Alvarestiń jekpe-jegi trılogııaǵa aınalýy ábden múmkin - Oskar De La Hoııa
ASTANA. QazAqparat - Meksıkalyq boksshy Saýl «Kanelo» Alvarestiń promoýteri Oskar De La Hoııa GGG-ge qarsy aldaǵy jekpe-jekti bir ret emes, eki ret revanshpen qaıta ótkizýge bolatynyn aıtyp otyr. Sóıtip, Golovkın - Alvares jekpe-jegin trılogııaǵa deıin jalǵastyrýǵa bolady, dep habarlaıdy QazAqparat tilshisi.
«Trılogııa ma? Árıne, oǵan da jetkizýge bolady. «Kanelo» - GGG - bul naǵyz tarıhı jekpe-jek. Bul tamasha aıqas bolady. Qazirdiń ózinde men ony trılogııa retinde elestetip otyrmyn. Ondaı jekpe-jekterdiń jalǵasyn mindetti túrde ótkizý kerek», - dedi De La Hoııa ESNews-qa bergen suhbatynda.
Aıta keteıik, Golovkın men Alvarestiń arasyndaǵy kelisimshartqa sáıkes, GGG utylsa, revanshty talap ete almaıdy. Alaıda jeńiske jetse, revanshqa mindetti túrde kelisýi tıis. Sebebi meksıkalyq boksshy Saýl Alvarestiń ondaı basymdyǵy bar. Golovkın - Alvares jekpe-jegi 16 qyrkúıekte Las-Vegas qalasyndaǵy «T-Mobile Arena» sport kesheninde ótedi.
Buǵan deıin amerıkalyq bapker Robert Garsııa da osy jekpe-jekti trılogııaǵa deıin aparýǵa bolatyny jaıynda aıtqan bolatyn. "Menińshe, qaı boksshy jeńse de, bul úlken jekpe-jek bolady. Odan keıin biz ekinshi jekpe-jekti kóre alamyz. Menińshe, mamyr aıynda revansh bolady. Bálkim, arǵy jaǵy trılogııaǵa ulasýy ábden múmkin. Al osy trılogııadan keıin GGG zeınetke shyqsa da bolady. Sebebi ol qyrýar tabysqa kenele alady. "Kanelo" óz jolyn jalǵastyrady. GGG bolsa, qaltasyna 30 mıllıondy salyp alyp, bokspen qoshtasa alady. Kim biledi, bálkim odan da kóp aqsha tabatyn shyǵar", - deıdi Garsııa .
