Golovkın men Alvarestiń revanshy qaı ýaqytta kórsetiledi
ASTANA. QazAqparat - Golovkın-Alvares revanshy mamyrdyń 5-si kúni ótedi. Alaıda qarymta jekpe-jektiń ótetin jeri áli belgisiz, dep habarlaıdy QazAqparat tilshisi.
Boxingscene.com saıtynyń aqparatyna sáıkes, GGG men «Kanelo» arasyndaǵy revansh Soltústik Amerıkanyń ýaqyty boıynsha saǵat 20:00-de bastalady. Demek, Qazaqstanda atalǵan jekpe-jektiń translıatsııasy 6 mamyr kúni tańǵy saǵat 07:00-de kórsetiledi.
GGG-diń promoýteri Tom Lefflerdiń aıtýynsha, qazirgi kezde revansh úshin eki alań talasyp jatyr. MGM Resort-tyń ókilderi tıimdi usynys jasasa, jekpe-jek qaıtadan Las-Vegastyń «T-Mobile Arena» alańynda ótýi múmkin. Nıý-Iorktegi Madison Square Garden de qarymta jekpe-jekti uıymdastyrýǵa múddeli.
«Atalǵan eki mekeme óz usynystaryn jasaǵannan keıin eki-úsh aptanyń ishinde biz óz sheshimimizdi shyǵaramyz», - deıdi T.Leffler.
Al «Kanelonyń» ókili Oskar De La Hoııanyń sózine qaraǵanda, revanshtan túsetin tabystyń kólemi alǵashqy jekpe-jekten de artyq bolýy ábden múmkin.
«Birinshi jekpe-jekte bıletten túsken paıda 26 mıllıon dollardy qurady. Budan bólek, HBO-da 1,3 mıllıonnan astam aqyly translıatsııalar satyldy. Ol shamamen 80 mıllıon dollarǵa teń. Alǵashqy jekpe-jekten úsh apta buryn Floıd Meıveızer men Konor Makgregordyń kezdesýi ótken edi. Atalǵan shara tabystyń kólemine keri áserin tıgizdi. Osy joly revanshtan úsh ese artyq aqsha túsýi tıis», - dep atap kórsetti De La Hoııa.
Aıta keteıik, búgin Golovkın men Alvares revanshtyń ótetinin resmı túrde jarııalady.
