Golovkın men Alvares arasynda «qyrǵyn soǵys» bolady - promorolık
ASTANA. QazAqparat - YouTube jelisinde aldaǵy Golovkın - Alvares jekpe-jegine arnalǵan promorolık jarııalandy. Beınebaıannyń ataýy - "Total war", aýdarmasy - "Qyrǵyn soǵys", dep xabarlaıdy QazAqparat tilshisi.
Aıta keteıik, WBA Super, WBC, IBF jáne IBO nusqasy boıynsha tórt birdeı belbeýdiń ıegeri, qazaqstandyq boksshy Gennadıı Golovkın jáne meksıkalyq Saýl «Kanelo» Alvarestiń arasyndaǵy jekpe-jek aǵymdaǵy jyly 16 qyrkúıekte ótedi. Buǵan deıin Golovkınniń maýsym aıynda ulybrıtanııalyq Bıllı Djo Sonderspen aıqasýy kútilgen edi. Alaıda qazaqstandyq boksshynyń komandasy atalǵan jekpe-jekten bas tartty. Promoýter Tom Lefflerdiń aıtýynsha, olarǵa eshkim ýltımatým qoıǵan joq. Negizgi maqsat - boks álemindegi eń úlken jekpe-jekti jarnamalaýdy erterek bastaý. "Gennadıı 10 maýsym kúni rıngke shyqqan jaǵdaıda bárin keıinge shegerýge týra keletin edi. Oskar ı Golden Boy promoýshendi erterek bastaǵysy keldi. Sóıtip, maýsymdaǵy jekpe-jekten bas tartýdyń arqasynda Golovkın men Alvares arasyndaǵy aıqasty 6 mamyrda jarııalaýǵa múmkindik týdy", - deıdi Leffler.
Golovkın - Alvares jekpe-jegine jankúıerlerdiń rekordtyq sany jınalady degen boljam bar . Osy jekpe-jektiń jeńimpazy WBO tujyrymy boıynsha orta salmaqtaǵy álem chempıony Bıllı Djo Sonderspen (24-0, 12 KO) kezdesýi ábden múmkin. Ol jaıynda ulybrıtanııalyq boksshynyń promoýteri Frenk Ýorren de aıtyp otyr .
Al Golovkın men Alvares arasyndaǵy kelisimshartqa keler bolsaq, onda meksıkalyq boksshyǵa qarymta kezdesýge múmkindik berilip otyr. Bul degenimiz, Alvares utylsa, Golovkın mindetti túrde buǵan kelisýi tıis. Al qazaqstandyq boksshynyń ózi jeńilip qalsa, qarymta kezdesýdi talap ete almaıdy. Boxingnews24.com saıtynyń jýrnalısi Den Embroýztyń oıynsha, Golovkınge «sarybas» meksıkalyq juldyzdy nokaýtpen jeńý kerek. Eger bul aıqas ta nokaýtpen aıaqtalsa, GGG kásibı bokstyń ǵana emes, PPV reıtıngi shyńyna da shyǵa alady . YouTube-taǵy GOATBoxing arnasy Gennadıı Golovkın men Saýl «Kanelo» Alvarestiń nokaýttaryn salystyryp, arnaıy beınebaıan jasap shyǵardy.
