Golovkın Majarstan boks federatsııasynyń 100 jyldyq mereıtoıyna qatysty
ASTANA. KAZINFORM – Ulttyq Olımpıadalyq komıtetiniń prezıdenti, World Boxing Olımpıadalyq komıssııasynyń tóraǵasy Gennadıı Golovkın Majarstan boks federatsııasynyń 100 jyldyq mereıtoıyn atap ótýge arnalǵan is-sharanyń qurmetti qonaǵy boldy.
Ulttyq olımpıadalyq komıtettiń málimetinshe, is-shara Býdapeshttegi Batyrlar alańynda ótti.
Gennadıı Golovkın Býdapeshtke Majarstan boks federatsııasynyń prezıdenti, Olımpıada chempıony Ishtvan Kovachtyń arnaıy shaqyrtýymen bardy.
Mereıtoılyq sharaǵa túrli halyqaralyq uıymdardyń ókilderi jınaldy. Merekege Halyqaralyq Olımpıadalyq komıtetiniń boks isi jónindegi bóliminiń jetekshisi Breno Prantes, Eýropalyq boks federatsııasynyń prezıdenti Lars Brovıl, Panamerıkalyq boks konfederatsııasynyń prezıdenti Elız Senol, Eýropalyq boks federatsııasynyń vıtse-prezıdenti Almar Ogmýndson, Eýropalyq boks federatsııasy Atqarýshy keńesiniń múshesi Kırsı Korpaeýs, World Boxing prezıdenti Borıs van der Vorst jáne basqa da tulǵalar qatysty.
Merekelik baǵdarlamada jas erekshelikterine qaraı jasóspirimderden bastap, ardagerlerge deıin kórsetilimdik jekpe-jekter uıymdastyryldy. Sondaı-aq burynǵy chempıondar men tanymal tulǵalar qatysty.
Aıta keteıik, sapar barysynda Gennadıı Golovkın World Boxing sammıtine qatysyp, Býdapeshttiń sport nysandaryn aralady.
Eske sala keteıik, Halyqaralyq Olımpıadalyq komıteti World Boxing uıymyn Olımpıadalyq qozǵalys aıasynda álemdik deńgeıde boksty retteıtin halyqaralyq federatsııa retinde ýaqytsha moıyndady.
Bul sheshim 2028 jyly AQSh-tyń Los-Andjeles qalasynda ótetin Olımpıada oıyndarynyń baǵdarlamasynda bokstyń saqtalýyna múmkindik berdi.
Buǵan deıin Aqjúrek Tańatarovtyń Almaty oblysy dene shynyqtyrý sport basqarmasynyń tizginin ustaıtynyn habarlaǵan edik.