Golovkın-Leme jekpe-jegin 3,5 mıllıonnan astam qazaqstandyq tikeleı efırde tamashalady
ASTANA. QazAqparat - Orta salmaq dárejesinde bokstan 3 dúrkin álem chempıony Gennadıı Golovkın 2015 jylǵy 18 qazanda «Medıson Skver Garden» arenasynda tórtinshi ret chempıon atandy.
Qazaqstan halqy Gennadıı Golovkın men kanadalyq boksshy Davıd Lemeniń jekpe-jegin asyǵa kútti. Gennadıı, óz kezeginde, Halyqaralyq boks federatsııasynyń (IBF) nusqasy boıynsha eks-chempıony Davıd Lemeni 8-shi raýndta jeńip, el úmitin aqtady. Bul jekpe-jek boks jankúıerleriniń kóńilinen shyqqan kásipqoı bokstaǵy áserli oqıǵa boldy.
Golovkın-Leme jekpe-jegin «Qazaqstan» jáne «KAZSPORT» arnalary tikeleı efırde kórsetti. 3,5 mıllıonnan astam qazaqstandyq jekpe-jekti tikeleı efırde tamashalady, dep habarlaıdy «Qazaqstan» RTRK baspasóz qyzmetinen.
Sondaı-aq «Qazaqstan» telearnasy jekpe-jekti tańerteń kóre almaǵan kórermender úshin onyń qaıtalaýyn saǵat 13.00-de jáne 18.55-te kórsetti. Jekpe-jektiń qaıtalaýyn 1,5 mılıonnan astam telekórermen tamashalady.
Budan basqa, jekpe-jek «Qazaqstan» telearnasynyń resmı saıtynda onlaın-rejimde kórsetildi. Telearnanyń ınternet-redaktsııasynyń málimetteri boıynsha kórermenderdiń saıtqa kirý sany bir mıllıonnan asty.
«Qazaqstan» jáne «KAZSPORT» telearnalary aldaǵy ýaqytta da elimizde jáne álemdegi ótetin mańyzdy sport oqıǵalardy tikeleı efırde kórsetýdi jalǵastyrady.
