Golovkın-Leme jekpe-jegi qarsańyndaǵy 5 saýal

Golovkınniń PPV-daǵy debıýti sátsizdikke ushyrap júrmeı me?

Gennadıı Golovkın óziniń sporttyq mansaby jolyndaǵy kezekti jekpe-jegin PPV-ta alǵash ret ótkizbek. Árıne, bul jaıt Qazaqstan boksshysy úshin óziniń sporttyq mansaby jolynyń damýynyń tabysty kezeńi ekendigi sózsiz. Óıtkeni, Eýropa men Azııa ókilderin aıtpaǵannyń ózinde tipti amerıkandyq boksshylarynyń ózi PPV-da óner kórsetýi sırek. Degenmen, GGG men onyń qarsylasy Davıd Leme arasyndaǵy jekpe-jekti uıymdastyrýshylar óz taraptarynan barynsha táýekeldi qadamǵa baryp otyrǵany shyndyq. Ózderiniń shyǵyndaryn jaýyp, boksshylarǵa syıaqy tóleýmen qatar, paıda da tabý úshin NVO arnasy qarapaıym amerıkandyq azamattar translıatsııany kórý quqyǵyn satyp alady dep úmittenýde. Ol úshin amerıkandyqtar 70 dollardan tóleýi tıis. Al buǵan deıingi tájirıbe men statıstıka kórsetkendeı, amerıkandyqtar burynǵy KSRO-dan shyqqan boksshylardyń sharshy alańdaǵy aıqasyn kórý úshin ámııandarynan aqsha shyǵarýǵa tym asyǵa qoımaıdy.

Aıta keterligi, Gennadıı Golovkın PPV-da jekpe-jegi kórsetiletin TMD-dan shyqqan úshinshi boksshy bolmaq. Este bolsa, 2004 jyly ýkraındyq Vıtalıı Klıchko PPV-da eń birinshi bolyp sharshy alańǵa kóterilgen edi. Ol Dennı Vılıamsqa qarsy shyqqan-dy. Odan keıin Qazaqstannyń boks mektebinen tálim-tárbıe alǵan Oleg Maskaev Hasım Rahmanmen aıqasqan bolatyn. Degenmen, bul jekpe-jekterdegi PPV-kórsetkishteri tym az, ıaǵnı 120 myń men 60 myń kórermendi ǵana jınaı aldy. Uıymdastyrýshylar úshin bul jaıt qurdymǵa ketýmen teń. Aıtpaqshy, mundaı júıede tabys ákelgen TMD-dylyq boksshy Kostıa Tszıý bolǵany este. Biraq, onyń sharshy alańdaǵy kezdesýi AQSh-ta emes, Avstralııada PPV-da kórsetilgen edi.

Uıymdastyrýshylar bul jekpe-jekti kórý úshin keminde 250-300 myń biregeı paıdalanýshy aqsha tóleıdi dep úmittenýde. Eger aqyly translatsııa kórýshilerdiń sany bul kútiletin deǵgeıden tómen bolsa, onda G.Golovkınniń PPV-daǵy debıýti sátsizdikke ushyrady deýge bolady.

G.Golovkın D.Lememen jekpe-jegi úshin qansha gonorar alady?

Bul saýaldyń jaýaby birinshi sóz etken máselemizge tikeleı baılanysty. ıAǵnı, Golovkınniń de, onyń qarsylasynyń da gonorarynyń kólemi tikeleı amerıkandyq azamattardyń qolynda. Qazaqstandyq men kanadalyqtyń sharshy alańdaǵy aıqasyn tamashalaǵysy kelgen adamdardyń legi kóbeıgen saıyn boksshylardyń banktegi esepshottaryna quıylatyn qarjy da arta túsedi. Árıne, naqty belgilengen stavka da bar. Bul rette onyń kólemi shamamen 2 mln. dollardy quraıdy. Biraq, mundaı jaǵdaıda eki tarap ta onyń kólemine kóńilderi kónshı qoıýy neǵabyl. Tipti, jekpe-jek 250-300 PPV jınaıtyn bolsa, onda jalpy paıdany eseptep shyǵarý qıyn emes. Máselen, 250 myńdy 70 dollarǵa kóbeıtsek, onda 17,5 mln. dollar shyǵady. Bul somanyń jartysyna jýyǵy PPV-operatorǵa ketse, al qalǵan jartysy boksshylar men promoýterlerge buıyrady. Sonymen qatar kanal da biraq qarjyny qaltasyna basady. Tipti, kórsetilim satylymy 200 myńdy mańaılaǵannyń ózinde bul kepildendirilgen gonorardy tóleýmen qatar boksshylarǵa qosymsha soma aýdarýǵa da jetkilikti. Demek, jaǵdaı dál osylaı órbıtin bolsa, Golovkın men Leme 4-5 mln. dollardy bólip alady degen sóz. Al eger jekpe-jekti aqyly negizde kórýshilerdiń sany 300 myńǵa barsa, onda boksshylar shamamen 7 mln. dollardy bólisedi.

Munan bólek, translatsııa tek jalǵyz tabys kózi emes ekendigin de esten shyǵarmaý kerek. ıAǵnı, bılet satýdan túsetin de kiris bar. Aldyn ala esepteýler boıynsha ol shamamen 1 mln. dollardy quraıdy.

Sonymen bul saýaldy túıindeı kele G.Golovkın osy jolǵy jekpe-jeginde rekordtyq gonorar ǵana alyp qoımaı, buǵan deıingi kishi Vıllı Monromen aıqasy úshin alǵan syıaqysynyń somasynan birshama artyq qarjyny qaltasyna basatyndyǵyn 99,999 paıyz senimmen aıtýǵa bolady.

G.Golovkın 4 bel beý di toptastyra ala ma?

Gennadıı Golovkın men Davıd Leme arasyndaǵy jekpe-jek chempıondyq tıtýldar turǵysynda da zor sporttyq shytyrmanǵa toly. Ózderińiz-aq oılap kórińizdershi: Jeksenbi kúni dańqty «Medıson-skver-garden» sport kesheninde orta salmaqtaǵy tórt birdeı belbeý sarapqa salynbaq. WBC nusqasy boıynsha ýaqytsha chempıon, WBA nusqasy boıynsha sýperchempıon jáne IBO nusqasy boıynsha chempıon tıtýldaryna ıe G.Golovkın IBF belbeýine ıelik etken qarsylasymen aıqasqa túspek. ıAǵnı, kanadalyqtyń bul joly bási basym bolsa, onda ol qazaqstandyq boksshynyń 3 belbeýine birden ıelik etedi. Al barlyq belbeýlerdi toptastyrý basty armany ekendigin birneshe márte aıtqan G.Golovkın bolsa, óz kollektsııasyn IBF belbeýimen tolyqtyrýǵa asyǵyp júrgeni aıdan anyq jaıt. Sondyqtan aldaǵy jekpe-jektiń basty saýaly bylaı órbise óte oryndy: jeńilip kórmegen G.Golovkın óz kollektsııasyn IBF nusqasy boıynsha álem chempıonynyń tórtinshi belbeýimen tolyqtyra ala ma?

Boksshylardyń urys máneri qandaı bolmaq?

Golovkın men Lemeniń judyryqtasý máseleleri jekpe-jek qarsańynda barynsha shytyrman saýaldardyń biri bolyp otyr. Óıtkeni, ekeýi de ózderiniń qýatty soqqylaryna basymdyq bere otyryp, urystyń shabýyldaýshy stıline basa mán beretindigi belgili. GGG soqqysynyń aýyrlyǵynyń qanshalyqty qýatty ekendigin biz olardyń aýyzdarynan talaı estigen edik. Este bolsa, ekinshi orta salmaqtaǵy WBA jáne IBF chempıony Karl Froch NVO telearnasyn bergen suhbatynda Gennadııdiń soqqysyn attyń tebisine teńep, odan aýlaq júrýge shaqyrǵany bar edi.

Kanadalyqtyń da soqqysy joıqyn. Biraq, Leme qazaqstandyq boksshymen judyryqtasý barysynda jıi shabýylǵa boı aldyrý ózine qanshalyqty qaýipti ekendigin jaqsy biledi. Sebebi, Davıd shabýylǵa shyqqanda qorǵanysty umytyp ketetini bar.

Gennadııdiń basty qarýy djeb soqqysy desek bolady. Kóptegen mamandardyń pikirinshe, Golovkınniń djebi qazirgi boksshylardyń arasynda eń úzdigi sanalady. Sondyqtan da bul kezdesýde Leme óziniń maqamymen urys júrgize ala ma álde nokaýtqa túsýden jasqanyp, tas-qamal qorǵanysta júre me, degen saýal kólbeńdeıdi.

Dál osyndaı saýaldy Golovkınge de qoıýǵa bolatyn sııaqty. Este bolsa, buǵan deıingi kishi Monromen aradaǵy jekpe-jekte qazaqstandyq birneshe aýyr soqqyny jiberip alǵan-dy. Baqytymyzǵa oraı Monronyń soqqysy tym aýyr bolmaǵandyqtan Gennadııge aıtarlyqtaı problema týyndamaǵan edi. Al Lemeniń soqqysy joıqyn. Sol sebepti Abel Sanches óz shákirtin kanadalyqtyń tikeleı soqqysyn jibermeýge keńes beretindigin sózsiz.

G.Golovkın qaı raýndta merziminen buryn jeńiske jetedi?

Sońǵy saýal sál dórekileý estilgenimen, sońǵy ýaqytta óziniń senimdi jeńisterimen Gennadıı Golovkın jankúıerlerin dál osy saýal tóńireginde túrli boljamdar jasaýǵa úıretip qoıǵany bar. Máselen, qazaqstandyq boksshymen judyryq túıistirgen Ishıda, Maklın jáne Gıl úshinshi raýndtan ary asa almady. Al Rýbıo bolsa, tipti úshinshi raýndqa da ilige almaı qalǵan bolatyn. Al kishi Vıllı Monronyń olarǵa qaraǵanda birshama tegeýirin kórsetkeni bar. Degenmen, ol da 6- raýnda Gennadııdiń aýyr soqqysynan keıin esten tanǵan edi. Qazaqstandyq boksshylardyń joǵaryda atap ótken qarsylastaryna qaraǵanda brıtandyq Martın Mıýrreı tegeýirindi, tabandy boksshy ekenin kórsete alǵan sııaqty. Ol 11 raýnd boıy qazaqstandyq boksshynyń aýyr soqqylaryna shydaǵan bolatyn. Aıtpaqshy, NVO telearnasyna bergen suhbaty barysynda Abel Sanches shákirtiniń qarsylasyn tórtinshi raýndta nokaýtqa jiberetindigin aıtyp edi.