Golovkın: Kotto-Alvares kezdesýiniń jeńimpazymen shyqqym keledi
ASTANA. QazAqparat - Kásipqoı boksta orta salmaqtaǵy WBA (Super), WBC (Interim) jáne IBO nusqasy boıynsha chempıony, qazaqstandyq boksshy Gennadıı Golovkın IBF chempıony Davıd Lemeni 8-shi raýndta texnıkalyq nokaýtpen jeńgennen soń, orta salmaqtaǵy barlyq chempıondyq belbeýlerdi jınaıtynyn málim etti.
"Men óte baqyttymyn. Men dostaryma úlken shoý syıladym. Meniń dostaryma, jankúıerlerime, xalqyma úlken alǵys aıtamyn!", - dep atap ótti Gennadıı Golovkın jekpe-jekten keıingi sózinde. "Leme tamasha boksshy, men ony syılaımyn. Men barlyq belbeýlerdi alyp, jańa tarıx jazǵym keledi. Men bıznesmen emespin, men - boksshymyn. Mende tórt belbeý bar, endi keleshekte odan da kóp bolady dep sanaımyn", - dedi boksshy. "Al endi ne bolady? Men Mıgel Kotto - Saýl Alvares jekpe-jeginiń jeńimpazymen shyqqym keledi". Aıta keteıik, Gennadıı Golovkın men Davıd Leme arasyndaǵy jekpe-jekte «Medıson-skver-garden» sport kesheninde orta salmaqtaǵy tórt birdeı belbeý sarapqa salyndy. WBC nusqasy boıynsha ýaqytsha chempıon, WBA nusqasy boıynsha sýperchempıon jáne IBO nusqasy boıynsha chempıon tıtýldaryna ıe G.Golovkın taǵy bir chempıondyq belbeýge ıelik etti. Barlyq belbeýlerdi toptastyrý basty armany ekendigin birneshe márte aıtqan G.Golovkın, óz kollektsııasyn IBF belbeýimen tolyqtyrdy.
