Golovkın komandasyndaǵy bapkerler men menedjerler qansha jalaqy alady

NUR-SULTAN. QazAqparat - Boxingscene.com saıtynyń avtory Stıven Edvards qazaqstandyq kásipqoı boksshy Gennadıı Golovkınniń komandasynda jalaqy qalaı tólenetindigi týraly aıtyp berdi, dep habarlaıdy «QazAqparat» HAA Sports.kz saıtyna silteme jasap.

Edvardstyń aıtýynsha, Abel Sanches Golovkınniń gonorarynan bekitilgen stavkasyn 10%-dan 2%-ǵa deıin tómendetýden bas tartyp, durys sheshim qabyldady.

«Ózin joǵary baǵalaıtyn bapkerdiń jalaqysy joǵary bolýy kerek, sol kezde ol bekitilgen 10%-dan tómen ala alady. Máselen, boksshy 10 mıllıon dollar tabys tabatyn bolsa, jattyqtyrýshyǵa 750 myń dollar tóleıdi, ıaǵnı 7,5%. Óz basym bapkerge 2% tóleıdi degendi estimeppin. Gonorary jeti, segiz tańbaly sandarǵa jetkenshe, jalaqy tómendegideı bólinedi: 10% - bapkerge, 5% - bapkerdiń kómekshisine, 2% - fızıkalyq daıyndyq jónindegi jattyqtyrýshyǵa. Shamamen osylaı. Keıbir bapkerler men promoýterler 10%-dan kóp alatyny meni tańǵaldyrady. Ádil promoýterler tabysty kelesideı bóledi: 80% - boksshyǵa, 20% - ózine. Bul ádil bolǵanda. Al shyndyǵynda 50 de 50 de kezdesip jatady. Zań júzinde menedjerler, komandaǵa tólenetin bolsa, 40% nemese 33,3% ala alady. Sondyqtan promoýterler men menedjerlerdiń bapkerden kóp alatyny meniń kúlkimdi keltiredi. Menedjerdiń jumysy - boksshyǵa jaqsy qarsylas tańdaý. Ádette menedjer bapkerdi shaqyryp alyp, odan osy qarsylastan basym túse ala ma dep suraıdy. Osylaısha, bapker tálimgerlikten bólek, menedjerdiń qyzmetiniń bir bóligin de atqarady», - dep jazady Edvards.

Aıta keteıik, 8 maýsym kúni Gennadıı Golovkın alǵash ret jańa bapker Djonaton Benkstiń basshylyǵymen kanadalyq Stıv Rollspen jekpe-jekke shyǵady.

Býkmekerlerdiń paıymdaýynsha, Golovkınniń jeńisine koeffıtsıent - 1.01, Rolls jeńisine - 19, teń túsedi degenge - 34.