Golovkın kelesi jyly 4 jekpe-jek ótkizýge nıetti
ASTANA. QazAqparat - Kelesi jyly WBA jáne IBO chempıony qazaqstandyq boksshy Gennadıı Golovkın 4 jekpe-jek ótkizýdi josparlap otyr. Bul týraly «VKontakte» áleýmettik jelisindegi boksshynyń «Gennadıı GGG Golovkın» paraqshasynda habarlandy.
«Bıyl men endi eki kezdesý ótkizemin. Biraq kelesi jyly men 4 jekpe-jekke shyǵamyn dep otyrmyn», - dedi ol.
Onyń aıtýynsha, bıyl úshinshi judyryqtasýy úlken oqıǵa bolatynyna senimdi. Aıta keteıik, G.Golovkın kelesi kezdesýdi 26 shildede 20 myń oryndyq Madison Square Garden stadıonynda ótedi dep josparlanýda. Onyń promoýteri Tom Leffler avstralııalyq boksshy Denıel Gılmen kelissózder júrgizýde. Úshinshi jekpe-jek qazanda nemese qarashada ótýi yqtımal.
7 maýsymda ótetin Martınes-Kotto arasyndaǵy kezdesýdiń jeńimpazy Golovkınge qarsylas atanýy múmkin. Ony qazaq boksshysynyń ózi rastap otyr. «Bul óte qyzyq kezdesý bolmaq», - deıdi Golovkın Martınes-Kotto jekpe-jegi týraly. «Kotto tehnıkalyq turǵyda óte saýatty jáne sol qoly óte myqty. Serhıo úlken jáne kúshtirek. Menińshe Mıgel Serhıo úshin azdap kishkentaılaý, biraq kezdesý kórsetedi. Árıne men osy jekpe-jektiń jeńimpazymen kezdesýge qulyqtymyn», - dep atap ótti ol jýrnalısterge bergen suhbatynda.
Promoýter Lefflerdiń aıtýynsha, Golovkınniń qarsylastary retinde Karl Froch - Djordj Grovs jekpe-jeginiń jeńimpazyn qarastyrýǵa bolady. Sonymen qatar óziniń sporttyq mansabyn jaqynda ǵana támamdaǵandyǵyn habarlaǵan sýper orta salmaqtaǵy bes dúrkin chempıon Mıkkel Kesslerdi de tasada tys qaldyrýǵa bolmaıdy.
