Golovkın qazirgi deńgeıge qalaı jetkenin bir sátke de umytpaıdy - Sheın Mozlı

ASTANA. QazAqparat - Úsh salmaq dárejesi boıynsha álem chempıony bolǵan amerıkalyq Sheın Mozlı tórt birdeı belbeýdiń ıegeri Gennadıı Golovkınniń jeńisti joly jaıynda suxbat berip, GGG-diń tabysty óner kórsetýiniń syryn ashyp kórdi. 

Mozlı talaı ret onymen sparrıngke shyqqan, dep xabarlaıdy QazAqparat tilshisi.

"Sóz joq, ol óte eńbekqor. Sosyn alǵan betinen qaıtpaıdy. Men onyń baryn salyp, ylǵı jumys istep júrgenin kórdim. Barlyq elementterdi tap-tuınaqtaı oryndaıdy. Qazir ol quzar shyńnyń bıigine shyǵyp otyr. Men bolsam, onyń únemi júgirgenin, qapty urǵanyn, bapkeri Abel Sanchestiń bergen tapsyrmalaryn buljytpaı oryndap jatqanyn kórip júremin. Ol ylǵı jumys istep júredi, esh toqtamaıdy. Sosyn, bárinen bólektenip, Bıg-Bear jeke bir úıinde jatpaıdy. Zalda barlyq boksshylarmen birge turady. Mine, dál osy bir nárse kóptegen myqty boksshylardyń jeńisti jolyna túrtki boldy. Sebebi olar óz deńgeıine qalaı jáne qaıdan jetkenin bir sátke de umytpaıdy. Golovkın de sony esten shyǵarmaıdy. Ol Gollıvýdtyń bir juldyzy, ıa bolmasa, bárine qol jetkizgen adam sııaqty jattyqpaıdy. Kóppen birge júredi. Menińshe, dál osyndaı minezdiń arqasynda ol qazirgi deńgeıge jetip otyr", - dedi tanymal boksshy Sheın Mozlı FightSpace saıtyna bergen suxbatynda.

Aıta keteıik, 18 naýryzda Nıý-Iork qalasynda Gennadıı Golovkın amerıkalyq boksshy Dennı Djeıkobspen judyryqtasady. Atalǵan jekpe-jek Qazaqstanda tikeleı efırden 19 naýryz kúni tańerteń kórsetiledi.