Golovkın qazaqstandyqtardy Otan qorǵaýshylar kúnimen quttyqtady
ASTANA. QazAqparat - WBA Super, WBC, IBF jáne IBO nusqasy boıynsha orta salmaqtaǵy álem chempıony Gennadıı Golovkın óziniń Instagram -daǵy paraqshasynda otandastaryn 7 mamyr - Otan qorǵaýshylar kúnimen quttyqtady, dep habarlaıdy «QazAqparat» HAA.
Golovkın qazaqstandyqtardy búgingi merekemen quttyqtaı otyryp, otandastaryn Kanelomen ótetin aıqas týraly jaqsy jańalyǵymen qýantty.
«Qazaqstandyqtardy Otan qorǵaýshylar kúnimen quttyqtaımyn! Dál osy kúni otandastarymyzdy Kanelomen bolatyn aldaǵy úlken aıqas týraly jaqsy jańalyqpen qýanta alǵanymyzǵa dán rızamyn. Qoldaý tanytqandaryńyz úshin alǵysym sheksiz», - dedi Golovkın.
Eske salaıyq, 6 mamyr kúni Las-Vegas qalasynda orta salmaqtaǵy burynǵy álem chempıony kishi Hýlıo Sezar Chaves pen WBO nusqasy boıynsha álem chempıony Saýl "Kanelo" Alvares aıqasyp, upaı sanymen "Kanelo" jeńimpaz atandy. Osy keshte meksıkalyq boksshy Alvares qazaqstandyq Gennadıı Golovkınmen 16 qyrkúıek kúni judyryqtasatynyn málimdedi.
