Golovkın «Kanelomen» jasasqan mámile týraly aıtty
«Árıne, men revanshtyń bolǵanyn qaladym, alaıda mańyzdy máselelerdiń qataryna qosqan joqpyn. Buǵan «Kanelonyń» aqpan aıynda eki dopıng-synamadan ótpeı qalýy sebep boldy. Men 5 mamyrda Vanes Maptırosıandy jeńgennen keıin promoýterim Tom Lefflerge «Kanelomen» revansh ótkizý jóninde jańa kelissózder júrgizýge ruqsat berdim.
«Kanelo» men «Golden Boy Promotions» meni 5 mamyrda bolmaı qalǵan ekinshi kezdesýdiń sharttarymen judyryqtasady dep oılap, jańasyn qoıǵanyma kóńilderi tolmady. Buǵan «Kanelonyń» dopıng-synamalardan ótpeı qalýy sebep bolǵanyn moıyndaýdan bas tartty. Bul meniń emes, olardyń kinási.
Men jáne meniń komandam birigip jumys jasaıtyn seriktesterimizben kásibı deńgeıde aralasamyz. Qandaı jaǵdaı bolmasyn syılastyq tanytamyz. Alaıda «Golden Boy» usynysymdy BAQ-qa jarııalap, maǵan til tıgizýge tyrysty. BAQ ókilderi, seriktester men jankúıerler olarmen kelisip, maǵan sharttaryn qabyldatqyzý úshin qysym kórsete alady dep oılaǵan bolýy kerek.
«Golden Boy» olardyń «sońǵy usynysyn» qabyldaý úshin merzim berdi. Bul jóninde kóp aıtylyp keldi. Men WBO chempıony Bıllı Djo Sonderspen tamyz aıynda bokstasý týraly kelisim jasasyp qoıǵanmyn, dál sol maqsatta Big Bear-de jattyǵý jıynyn bastaýdy josparlap júrdim. Alaıda Sonderstiń komandasyna «Kanelo» sharttarymdy qabyldaǵan jaǵdaıda Alvarespen aıqasatynymdy jetkizdim. Biz adamdarmen osylaı ashyq sóılestik. «Golden Boy»-dan bir saǵattan keıin naqty sheshim kelgen boıda Tomǵa olar bizdiń sharttardy qabyldaıtyny týraly habarlama kelip, osymen kelisim jasaldy», - dedi Golovkın.
Golovkın men Alvarestiń alǵashqy kezdesýi 2017 jylǵy 16 qyrkúıekte Las-Vegaste ótip, Adelaıda Berdtiń «Kanelonyń» paıdasyna qaraı qoıǵan 118-110 esebimen teń túsken edi. Qarymta kezdesý dál sol jerde ótetin bolady. Boksshylar qyzý daıyndyq júrgizip jatyr.
