Golovkın «Kanelomen» úshinshi aıqasqa qandaı ózgerister engizedi
ASTANA. QazAqparat - Qazaqstandyq boksshy Gennadıı Golovkın (38-1-1, 34 KO) ESPN-ge bergen suhbatynda meksıkalyq Saýl Alvarespen (49-1-2, 34 KO) ótýi yqtımal úshinshi jekpe-jek aldynda qandaı ózgerister engizýdi josparlap otyrǵanyn aıtty, dep habarlaıdy Sports.kz.
«Men kóptegen aıqastardy joǵary deńgeıde ótkizdim. Múmkin, jyldamdyqta, strategııada azdaǵan ózgerister bolǵan shyǵar... Jáne sondaı-aq kelesi joly qalany ózgertkim keledi: Vegas emes, basqa bir qalada bolýy múmkin», - dep bólisti Golovkın.
Eske salaıyq, Golovkın - «Kanelo» rematchy 16 qyrkúıek kúni Amerıka Qurama Shtattarynyń Las Vegas qalasyndaǵy T-Mobile Arena-da ótken bolatyn. Nátıjesinde otandasymyz tóreshiler sheshimimen (113-115, 114-114, 113-115) jeńilip, WBA Super, WBC jáne IBO tujyrymdary boıynsha orta salmaqtaǵy chempıondyq beldikterinen aıyryldy. Eske salaıyq, olardyń birinshi aıqasy byltyr teń nátıjemen aıaqtalǵan edi.
