Golovkın «Kanelomen» rematchty ózgeshe ótkizbek

ASTANA. QazAqparat - Qazaqstandyq boksshy Gennadıı Golovkın (38-0-1, 34 KO) meksıkalyq Saýl Alvarespen (49-1-2, 34 KO) aldaǵy jekpe-jegine qatysty pikir bildirdi, dep habarlaıdy Sports.kz.

«Ekinshi aıqasymyzdy kóptegen adam kóretin bolady. Birinshi aıqastyń tájirıbesinen oıǵa túıgenderim bar. Sondyqtan ekinshi aıqasymdy azdap ózgertemin. Ózgertýim kerektigin bilemin. Qazir múldem basqa jaǵdaı, bólek emotsııalar, basqa bıznes-kelisim, bári ózgeshe. Eń bastysy,  15 qyrkúıek kúni jekpe-jek bolady - bul meksıkalyqtar úshin uly kún - Meksıkanyń Táýelsizdik kúni. Biz úshin bul úlken aıqas. Kim jeńedi? Bul boks, munda bári bolýy múmkin. Árqaısymyzda múmkindik bar. Kezdesýdi asyǵa tosyp júrmin. Sebebi ol boks álemindegi eń úlkeni. Onyń tóreshiler jaǵynan jáne bizdiń tarapymyzdan anaǵurlym kásibı bolatynyna úmittenemin. Bul adamdar úshin úlken syı bolady», - dedi Golovkın.

Eske salaıyq, Golovkın-Kanelo alǵashqy kezdesýi 2017 jyldyń 16 qyrkúıegi kúni Las-Vegasta ótken bolatyn. Jekpe-jek teń aıaqtaldy. Rematch atalmysh qalada bıylǵy 15 qyrkúıekte ótetini josparlanǵan.