Golovkın «Kanelomen» alǵashqy jekpe-jegine daıyn bolmaǵanyn moıyndady

ASTANA. QazAqparat - Qazaqstandyq boksshy Gennadıı Golovkın Saýl «Kanelo» Alvarespen ótken alǵashqy kezdesýde óz áleýetin tolyq kórsete almaǵanyn jasymady, dep habarlaıdy QazAqparat Sports.kz-ke silteme jasap. 

«Kanelo» alǵashqy kezdesýdiń aldynda maǵan naǵyz meksıkalyq ádisti kórsetetinin kóp aıtty, biraq ózi kóp qozǵaldy. Bul biraz tańdandyrdy. Múmkin, men árbir raýndqa daıyn bolmaǵan shyǵarmyn. Aıqastyń alǵashqy jartysyna daıyn edim, biraq ekinshisine emes. Endi ekinshi jekpe-jekte kóbirek drama, kóbirek ekshn kórsetemin. Ótken kezdesýge 100% daıyn emes edim, endi daıynmyn. «Kanelo» da solaı», - deıdi GGG Yahoo! Sports-qa bergen suhbatynda.

Eske sala keteıik, Golovkın men Alvares arasyndaǵy alǵashqy aıqas 2017 jylǵy 16 qyrkúıekte teń nátıjemen aıaqtalǵan bolatyn, al ekinshi kezdesý 5 mamyrǵa belgilengen.