Golovkın «Kaneloǵa» tyıym salynsa, kimmen aıqasatyndyǵyn aıtty

ASTANA. QazAqparat - Qazaqstandyq bylǵary qolǵap sheberi Gennadıı Golovkın (37-0-1, 33 KO) dopıng daýyna ilikken Saýl Alvareske (49-1-2, 34 KO) tyıym salynsa, kimmen jekpe-jekke shyǵýy múmkin ekenin aıtty, dep habarlaıdy QazAqparat Sports.kz-ke silteme jasap.

«Osy jekpe-jek bolady dep áli úmittenip otyrmyn. Biraq bárin komıssııa sheshedi. «Kanelo» men onyń komandasyn bilgendikten, mundaı qadamǵa barady dep kútken joqpyn. Bul oqıǵa meniń jáne Alvarestiń sportqa degen kózqarasymyzdy kórsetti. Eger jekpe-jekke ruqsat etilmese, men úshin kelesi qarsylas Sonders bolady, óıtkeni meniń armanym - orta salmaqtyń búkil beldigin jınaý», - dedi Golovkın.

Eske sala keteıik, Alvarestiń múddesin qorǵaıtyn Golden Boy promoýterlik kompanııasy boksshydan alynǵan dopıng synamalardyń birinen tyıym salynǵan preparat - Klenbýterol tabylǵany týraly aqparatty rastaǵan bolatyn.