Golovkın - «Kanelo» úshinshi aıqasy bıyl óte me - Promoýter jaýap berdi

NUR-SULTAN. QazAqparat – Brıtanııalyq promoýter Eddı Hırn DAZN strımıngtik servısimen birge AQSh-ta boks keshterin qaıta ótkizý máselesin talqylap jatyr. Ol kórermen nazaryna tanymal boksshylardyń qatysýymen jaqsy jekpe-jekter usynýǵa úmit artyp otyr, dep habarlaıdy QazAqparat Sports.kz saıtyna silteme jasap.

Hırnniń pikirinshe, koronavırýs pandemııasyna baılanysty úzilisten keıin kórermenderge qyzyqty bokstar usyný kerek.

Olar alǵashqy boks keshin tamyzdyń ortasynda ótkizýdi josparlap otyr. Oǵan jartylaı orta salmaqtaǵy burynǵy álem chempıony Redjıs Progreıs pen Morıs Hýker qatysady. Hırn qyrkúıekte birinshi jeńil salmaqta Hýan Fransısko Estrada men Roman Gonsales birlesken aıqasyn ótkizse, odan keıin birqatar qyzyqty jekpe-jekter uıymdastyrmaqshy. Olardyń qatarynda:

- jeńil salmaqtaǵy WBC chempıony Devın Heını men Lıýk Kempbell aıqasy;

- orta salmaqtaǵy WBO chempıony Demetrıýs Andrade men ekinshi orta salmaqtaǵy WBO chempıony Bıllı Djo Sonders aıqasy;

- ekinshi orta salmaqtaǵy WBA chempıony Kallým Smıt pen Denıel Djeıkobs aıqasy;

- Saýl «Kanelo» Alvares pen Gennadıı Golovkınniń úshinshi aıqasy bar.

«Bizde DAZN-men úsh dardaı boksshy bar: Entonı Djoshýa, Kanelo Alvares pen Gennadıı Golovkın. Bul - bokstaǵy úsh mańyzdy esim, sondyqtan jekpe-jek ýaqyt kestesin osy úsh esimge negizdep jasaý kerek. Sondyqtan, biz Progreıs — Hýker, Estrada — Gonsales pen Heını — Kempbell jáne Andrade — Sonders, Kallým Smıt - Dennı Djeıkobs, „Kanelo« Alvares - Gennadıı Golovkın aıqastaryn ótkize alsaq, demek osy jyldyń sońyna deıin jaqsy jekpe-jek uıymdastyrdyq degen sóz. Men kórermenge ádettegideı emes, jaqsy aıqastarmen oralǵym keledi», - dedi Hırn S.I. Boxing Podcast bergen suhbatynda.