Golovkın-«Kanelo» aıqasy neshe raýndqa sozylýy múmkin - Baqtııar Artaev boljamy
Boksshynyń aıtýynsha, ekinshi kezdesýde Gennadııge úlken múmkindik berilip tur.
«Ózderińiz kórgendeı, kóz arbasýdaǵy «Kanelonyń» sabyrsyzdyq tanytýy, dári-dármek qoldanbaı, bulshyq etteriniń kishireıýi, qobaljyp tózimnen aıyrylýy - munyń barlyǵy Gennadıı úshin úlken múmkindik. Onyń ústine Gennadıı salmaǵyn retke keltirip, burynǵydaı aýyr soqqymen alǵa umtylýǵa emes, jyldamdyǵyn arttyrýǵa kúsh saldy. Sondyqtan, Gennadııdiń qarsylasyna jyldam jáne nyq, aýyr soqqy berýin kútemiz. Osy joly Gennadıı Qazaqstanǵa aıqyn basymdyqpen jeńis syılaýy kerek», - dedi Baqtııar Artaev QazAqparat tilshisine bergen suhbatta.
Sonymen birge, Artaev birinshi jekpe-jekte Gennadııge jyldamdyq pen qýlyq jetispegenin eske saldy.
«Aldyńǵy jekpe-jektegi GGG qateligi - qarsylasyn qulatýǵa tyrysýy edi. Baıaý qozǵaldy, bar nazaryn aýyr soqqyǵa bólip, úlgermeı jatty. Kishkene qýlyqqa salyp, áýesqoı bokstaǵydaı jyldamdyqqa, tez soqqy jasaýǵa tyrysýy kerek edi. Osy joly otandasymyz bárin eskerip, jyldamdyǵyn arttyrdy, aıaǵyna mán berip jatyr. Aıaqpen jumys isteý arqyly «Kanelony» buryshqa taqap, sharshatyp baryp, nokdaýn beretin sııaqty. Ekeýi 6-7 raýndqa deıin tepe-teń kelip, 10-11 raýndta nemese tipti 9-raýndta Gennadıı «Kanelony» nokaýtqa túsirýi múmkin», - dedi Artaev.
Sonymen birge, Artaev «Erteńgi kezdesý Golovkınniń sońǵy jekpe-jegi bolýy múmkin be?» degen suraqqa jaýap berdi.
«Óziniń jáne baýyrlarynyń sózine qarasaq, sońǵy jekpe-jek bolýy da múmkin. Óıtkeni, sonsha jyl sportta bolý, sonsha jyl bir qalypta júrý - aǵzaǵa úlken aýyrtpashylyq. Jylyna 4-5 ret 85 keliden 72 kelige deıin salmaq tastaý ońaı emes. Ol da adam, onyń da jeke ómiri bar. Erteńgi kezdesýde úlken jetistikke jetse, boksty qoısa da jarasady. Sheshimdi árıne, ózi qabyldaıdy», - dedi Baqtııar Artaev.
