Golovkın Halyqaralyq Olımpıada komıteti komıssııasynyń múshesi bolyp taǵaıyndaldy
ASTANA. KAZINFORM – Qazaqstan Ulttyq Olımpıadalyq komıtetiniń prezıdenti Gennadıı Golovkın Halyqaralyq Olımpıada komıteti Olympism 365 komısııasynyń múshesi bolyp taǵaıyndaldy.
Bul týraly HOK prezıdenti Tomas Bah myrza Qazaqstan UOK-ke resmı hat arqyly habarlady, dep málimdedi komıtettiń baspasóz qyzmeti.
«Sizdi Komıssııa múshesi etip taǵaıyndaý men úshin úlken mártebe. Komıssııa jumysyna qosatyn úlken úlesińiz úshin Sizge aldyn ala alǵys bildiremin», - delingen hatta.
HOK komıssııalaryn onyń prezıdenti Tomas Bah qurady jáne HOK-tyń qyzmetin úılestirip, strategııalaryn jasaqtap, sondaı-aq, sheshim qabyldaý úshin uıymnyń Atqarý komıteti men jumys sessııalaryna usynystar engizetin HOK-tyń jumys organdary.
Olympism 365 komıssııasy BUU Turaqty damý maqsattaryna qol jetkizýdegi mańyzdy faktor retinde sporttyń rólin kúsheıtý úshin jumys isteıdi.
Olympism 365 strategııasy Olımpıadalyq qozǵatystyń ishindegi jáne odan tys kóptegen seriktestermen áriptestik ornatý jolymen júzege asady. Jobanyń basym baǵyttary halyqtyń densaýlyǵy men dene shynyqtyrý belsendiligin jaqsartý, ádilettilik, qaýipsizdik jáne ınklıýzıvtilik qaǵıdattaryn nyǵaıtý, beıbitshilikti saqtaý jáne bilim berý arqyly sporttyń áleýmettik máni men olımpıada prıntsıpterin kórsetedi.
Komıssııa quramyna HOK músheleri, Olımpıadalyq qozǵalystaǵy tanymal fýnktsıonerleri, sondaı-aq, Iordanııanyń taq murageri, hanzada Feızal Ál Hýsseın, Halyqaralyq jeńil atletıka federatsııasynyń prezıdenti Sebastıan Koe, Katar UOK prezıdenti, sheıh Djoan bın Hamad bın Halıfa Ál Tanı, sondaı-aq, belsendi sport qaıratkerleri men tanymal olımpıadashylar bar.
Lozannada Qazaqstan Ulttyq olımpıadalyq komıtetiniń Halyqaralyq Olımpıada komıtetine resmı is-sapary aıasynda Gennadıı Golovkın HOK basshysy Tomas Bahpen ózekti taqyryptardy talqylaǵan bolatyn.
