Golovkın Halyqaralyq boks Dańq zaly múshesine úmitker atandy

ASTANA.KAZINFORM — Qazaqstan kásipqoı boksynyń ańyzy, Olımpıada oıyndarynyń kúmis júldegeri Gennadıı Golovkın (42-2-1, 37KO) Halyqaralyq boks Dańq zaly (IBHOF) jańa músheligi úmitkerler qataryna endi.

Boxingscene.com saıtynyń habarlaýynsha, 2026 jylǵy IBHOF jańa músheligine úsh ańyz boksshy úmitker atanyp otyr. Olardyń qatarynda qazaqstandyq bylǵary qolǵap sheberi Golovkınnen basqa amerıkalyq Vernon Forrest jáne ırlandııalyq Stıv Kollınz bar.

Amerıkalyq basylymnyń habarlaýynsha, Gennadıı Golovkın orta salmaqta WBA/IBF/WBC nusqasy boıynsha uzaq jyldar chempıondyq ataǵyn qorǵap, boks jankúıerleri úshin keremet jekpe-jekter ótkizdi. Sońǵy jekpe-jegin 2022 jyly ótkizgen qazaqstandyq boksshy úsh jyl boıy belsendi bolmaǵan soń, ańyz boksshylar tizimi qataryna qosylýǵa laıyqty.

Vernon Forrest (41-3, 29KO) jartylaı orta salmaqta jáne kishi orta salmaqta álem chempıony atanǵan. Boksshy sońǵy jekpe-jegin 2008 jyly ótkizip, 2009 jyly buzaqylar qolynan qaza tapty.

Stıv Kollınz (36-3, 21KO) 1990-shy jyldary orta salmaqta jáne sýper orta salmaqta WBO tıtýldaryna ıe bolǵan.

Áıelder arasynda úmitkerler qatarynda Japonııanyń bes dıvızıon chempıony Naoko Fýdzıoka (19-3-1, 7 KO), germanııalyq eki dıvızıondaǵy álem chempıony Krıstına Hammer (28-1, 13 KO) jáne meksıkalyq Djekı Nava (40-4-4, 16 KO) bar.

Aıta keterligi, daýys berý nátıjesi jeltoqsan aıynyń basynda belgili bolady.

Osyǵan deıin habarlaǵanymyzdaı, Ulttyq Olımpıadalyq komıtetiniń prezıdenti, World Boxing Olımpıadalyq komıssııasynyń tóraǵasy Gennadıı Golovkın Majarstan boks federatsııasynyń 100 jyldyq mereıtoıyn atap ótýge arnalǵan is-sharanyń qurmetti qonaǵy boldy.