Golovkın eń kóp gonorar tólenetin boksshylardyń TOP-bestigine endi
Álem boıynsha teledıdardan berilgen alǵashqy boksshylar jekpe-jegi 1933 jyly Londonda orta salmaqtaǵy Archı Sekston men Lorı Raıterı arasynda boldy. Sodan beri teledıdardaǵy tegin translıatsııalar aqyly - pay-per-view deńgeıine deıin damydy. Shyn mánisinde búgingi tańda juldyzdy boksshylar bir keshte-aq baıyp ketý múmkindigine ıe. Qazir mıllıon dollarlyq qalamaqynyń jekpe-jegimen eshkimdi tańǵaldyra almaısyń. Oǵan 2018 jyldyń naýryz aıynan búgingi kúnge deıin eń joǵary aqy alyp kelgen boksshylardyń bestigi dálel bola alady.
5. Deonteı Ýaılder - 16,1 mln $
Asa aýyr salmaqtaǵy WBC chempıony Ýaılder ótken jyldyń naýryz aıynda jeńilip kórmegen kýbalyq Lýıs Ortısten basym bolyp, 2,1 mln $ aldy. Jeltoqsan aıynda Ýaılder Taıson Fıýrımen jekpe-jekke shyqty. Sol aıqasta shamamen 325 000 PPV satylyp, boksshyǵa 14 mln $ tabys ákeldi.
4. Mennı Pakıao - 30 mln $
Álem boıynsha segiz kategorııaly jalǵyz chempıon Pakıao sońǵy ret 19 qańtarda Las-Vegastaǵy «MGM Grand» arenada Edrıen Bronermen jekpe-jekke shyǵyp, biraýyzdy sheshimmen jeńiske jetti. Showtime arnasynan pay-per-view boıynsha kórsetilgen sol jekpe-jekte fılıppındyq boksshy 10 mln $ tabysqa keneldi. Habarlamalarǵa súıensek, sol aıqasta 400 myń PPV satylǵan. Alaıda, Pakıao úshin bul sonshalyqty joǵary kórsetkish emes, óziniń áldeqaıda áldirek jyldarynda ol budan da kóp tabys tapqan.
Shilde aıynda Pakıao Lýkas Mattısseni 7-shi raýndta nokaýtqa jiberip, ony WBA-nyń «turaqty» chempıony tıtýlynan aıyrdy. Sol jekpe-jekte «Pakmenniń» naqty qansha tabys tapqany belgisiz, alaıda onyń keńesshisi Maıkl Kontstyń málimetine súıensek, kem degende - 20 mln $.
3. Gennadıı Golovkın - 41 mln $
Orta salmaqtaǵy álem chempıony qazaqstandyq Gennadıı Golovkın. Ol ótken jyldyń qyrkúıek aıynda Saýl Alvarespen revanshta tóreshilerdiń sheshimimen jeńilip qaldy. Degenmen, jeńiliske ushyraǵan ol 40 mln $ aldy. Aqyly jazylýshylardyń sany 1,1 mln boldy. Odan tórt aı buryn Golovkın Vanes Martırosıandy eki raýnd ishinde op-ońaı nokaýtqa jibergen bolatyn. Nátıjesinde 1 mln $ tabys tapty. Golovkın jaqynda DAZN strımıngilik servısimen kelisimshartqa qol qoıdy. Kompanııa ony odan ári qomaqty chektermen qamtamasyz eteri sózsiz.
2. Entonı Djoshýa - 51,6 mln $
Ótken jyl aýyr salmaqtaǵy WBO, WBA jáne IBF chempıony úshin tabysty jyl boldy. Naýryzda Djozef Parker biriktirilgen jekpe-jekte jeńiske jetip, 28,5 mıllıon dollar tapty. Qyrkúıek aıynda A.ıA. Povetkındi 6-raýndta Wembley Stadium stadıonynda nokaýtqa túsirip, óz belbeýin qorǵaǵan. Bul jekpe-jegi úshin Djoshýa 28,5 mln$ tabysqa keneldi.
1. Saýl Alvares - 65 mln $
Ótken jyldyń kóktemindegi dopıng oqıǵasyna qaramastan orta salmaqtaǵy WBC/WBA chempıony Alvares 2018 jyly eki márte rıngke shyqty. Qyrkúıek aıyndaǵy Golovkınmen jekpe-jektegi jeńisi úshin ol 50 mln dollar aldy. Al jeltoqsan aıynda «Kanelo» DAZN-men kelisim boıynsha óziniń birinshi aıqasyn ótkizdi. 4 mamyrda Alvaresti absolıýtti álem chempıony ataǵy úshin kezdesý kútip tur. Ol bul joly IBF chempıony Denıel Djeıkobspen aıqasady. Bul jekpe-jek te Saýl úshin mol tabystyń kózi bolary sózsiz.
