Golovkın - Djeıkobs jekpe-jegi tikeleı efırde kórsetiledi
ASTANA. QazAqparat - 19 naýryzda Nıý-Iork qalasyndaǵy «Medıson Skver Garden» kesheninde WBA (Super), IBO, WBC jáne IBF nusqalary boıynsha orta salmaqtaǵy álem chempıony, qazaqstandyq kásipqoı boksshy Gennadıı Golovkın (36-0, 33 KO) men WBA nusqasy boıynsha álem chempıony, amerıkalyq boksshy Denıel Djeıkobs (32-1, 29 KO) arasynda jekpe-jek ótedi. Otandasymyzdyń bul jekpe-jegin «Qazaqstan» UTA men «Kazsport» telearnasy tikeleı efırde kórsetedi.
«Translıatsııa 19 naýryzda saǵat 08:00-de bastalady», delingen telearna saıtyndaǵy habarlamada .
Aıta keterligi, mansabynda birde-bir ret jeńilip kórmegen Gennadıı Golovkın sharshy alańda 36 jekpe-jek ótkizip, 33-in nokaýtpen aıaqtaǵan. Otandasymyz 2014 jyldyń maýsymynan bastap WBA nusqasy boıynsha sýperchempıon, 2011 jyldan bastap IBO nusqasy boıynsha álem chempıony, 2015 jyldan bastap IBF nusqasy boıynsha álem chempıony dárejelerine ıe. Al, 2016 jyly Saýl «Kanelo» Alvarestiń jekpe-jek ótkizýinen bas tartqannan keıin WBC nusqasy boıynsha álem chempıony atandy.
Qarsylasy Denıel Djeıkobs - orta salmaq dárejesindegi WBA nusqasy boıynsha álem chempıony (2014 jyldan bastap) jáne NABF nusqasy boıynsha Soltústik Amerıka chempıony (2010). Kásibı rıngte 33 jekpe-jek ótkizip, tek bir ret qana jeńilistiń aşy dámin tatyp kórgen. Amerıkalyq boksshyny reseılik Dmıtrıı Pırog nokaýtqa jibergen bolatyn.
Bul jekpe-jek Gennadıı Golovkınniń WBA (Super) nusqasy boıynsha sýperchempıon tıtýlyn 17-shi ret qorǵaýy bolmaq.
Qazirgi ýaqytta boksshylar berneshe aıǵa sozylǵan daıyndyqtaryn pysyqtap, jekpe-jekti kútýde.
