Golovkın Dıgeıl qarsylastarynyń bestigine endi
ASTANA. QazAqparat - Amerıkanyń BleacherReport.com saıty IBF sýper orta salmaqtaǵy álem chempıony, brıtandyq Djeıms Dıgeılmen jekpe-jekke shyǵýshy bes boksshyny atady.
Tizimniń tórtinshi ornynda Gennadıı Golovkınniń esimi tur, dep habarlaıdy Sports.kz.
Ring TV-ǵa taıaýda bergen suhbatynda Dıgeıl qazaqstandyqtyń keıbir álsiz tustaryn baıqaǵandyǵyn málimdedi.
«Bul úlken judyryqtasý bolatyn edi. Men onyń álsiz tustaryn baıqap ta turmyn. Onyń Vıllı Monromen jekpe-jegin kórdim, ol úshin solaqaılarmen aıqasý ońaı emes eken. Golovkın myqty soqqy bere alady, biraq ekinshi orta salmaq úshin azdaý. Sondyqtan bul salmaq dárejesine kóteriletin bolsa, oǵan tekserýden ótýi kerek», - dedi Dıgeıl.
Bul - batyl aıtylǵan sózder. Degenmen Golovkınniń qanjyǵasynda 33 jeńis bar, áli jeńilip kórmegen, oǵan qosa, ol WBA jáne IBO-nyń ortasha salmaqtaǵy chempıondyq beldikterdiń ıesi.
